Yekaterinburqda azərbaycanlı Ziyəddin Hüseynovun qətlə yetirilməsi ilə bağlı yeni detallar açıqlandı
Yekaterinburqda azərbaycanlı Ziyəddin Hüseynovun öldürülməsi ilə bağlı keçirilən mətbuat konfransında hadisənin təfərrüatları açıqlanıb. Baş Prokurorluğun İstintaq İdarəsinin müstəntiqi Pərviz Cəlilovun sözlərinə görə, Hüseynov evindən çıxarılarkən sərbəst hərəkət edib və onun bədənində həmin vaxt fiziki zorakılıq əlamətləri müşahidə olunmayıb.
Lakin müstəntiqin açıqlamasına əsasən, Ziyəddin Hüseynov daha sonra Rusiya hüquq-mühafizə orqanları tərəfindən avtomobilə mindirilərək orada fiziki zorakılığa məruz qalıb və aldığı xəsarətlər nəticəsində vəfat edib.
Baş Prokurorluğun İstintaq İdarəsinin rəisi Nemət Əvəzov isə bildirib ki, məsələ ilə bağlı Baş prokuror tərəfindən cinayət işi nəzarətə götürülüb. Onun sözlərinə görə, hazırda hadisə ilə bağlı 14 nəfər saxlanılıb, onlardan 12-si Azərbaycan vətəndaşıdır.
Əlavə olaraq qeyd olunub ki, iki nəfər xəstəxanada müalicə alır, saxlanılaraq işgəncəyə məruz qalan daha bir nəfər isə artıq Azərbaycana qayıdıb. Hazırda cinayət işi üzrə istintaq tədbirləri davam etdirilir.
12:51 02.07.2025
Oxunuş sayı: 8367
