Azərbaycanın Xorvatiyadakı Səfirliyində mədəniyyət və yaradıcı sənaye təmsilçilərinin işgüzar görüşü keçirilib
İyunun 24-də Azərbaycan Respublikasının Xorvatiyadakı Səfirliyində Azərbaycan və Xorvatiyanın mədəniyyət və yaradıcı sənaye (MYS) təmsilçilərinin iştirakı ilə B2B (business-to-business) formatlı görüş keçirilib.
Bu barədə Crossmedia.az-a Mədəniyyət Nazirliyindən məlumat verilib.
Tədbir iki ölkə arasında yaradıcı sənaye ilə bağlı ticarət-iqtisadi əlaqələrin möhkəmləndirilməsinə və əməkdaşlığın genişləndirilməsinə yönəlib.
Görüş çərçivəsində Azərbaycan Respublikasının mədəniyyət naziri Adil Kərimlinin iştirakı ilə brifinq təşkil olunub. Nazir hərtərəfli münasibətlərin inkişafı üçün əsas kimi mədəni mübadilənin vacibliyini vurğulayaraq yaradıcı sənaye, incəsənət və iqtisadi əlaqələrin möhkəmlənməsinə töhfə verə biləcək digər mədəniyyət sahələrində birgə layihələr üçün böyük potensialın olduğunu qeyd edib.
İşgüzar görüşdə yaradıcı sənaye nümayəndələri əməkdaşlıq üçün konkret imkanları, o cümlədən investisiya layihələrini, ixrac-idxal əməliyyatlarını və birgə müəssisələrin yaradılmasını müzakirə ediblər. Bu cəhdlərin tərəfdaşlığın dərinləşməsinə kömək etdiyinə, həm Azərbaycanda, həm də Xorvatiyada iqtisadi artım üçün yeni perspektivlər açdığına əminlik ifadə olunub.
Azərbaycan səfirliyində keçirilən görüş ikitərəfli münasibətlərin inkişafında mühüm addım olaraq hər iki ölkənin biznes dairələri və dövlət qurumları arasında dialoqun genişlənməsinə qarşılıqlı marağı təsdiqləyib.
09:38 25.06.2025
Oxunuş sayı: 589
