Siyasətçilərlə Qarabağda: Tural Abbaslı müəllim olmaq istədiyini dedi, siyasətçi politoloqu debata çağırdı - Reportaj
"Görüş yerini dəyişmək olmaz" prinsipi ilə eyni vaxtda, eyni yerdə-səhər saat altıda Bakı Su İdman Sarayının yanında görüşürük. Ətrafda tanış simaları görürəm-Milli Məclisin deputatları Elşad Musayevlə, Arzuxan Əlizadə ilə, politoloq Tural İsmayılovla, tanınmış jurnalist Elçin Şıxlı ilə və digərləri ilə görüşürəm.
Çox keçmir ki, hər kəs toplaşır və yola düşürük. Azərbaycan Respublikası Prezidenti Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin təşkilatçılığı ilə ölkədə fəaliyyət göstərən siyasi partiya sədrlərinin sayca yeddinci olan növbəti birgə səfəri çərçivəsində Füzuli, Cəbrayıl və Zəngilana gedirik.
Avtobusa mindiyimiz andan etibarən müzakirələr başlayır. Hər kəs yanındakı adamla nə isə barədə danışır.
Tanınmış ictimai-siyasi xadim, Milli Məclisin iki çağırış deputatı Qulamhüseyn Əlibəyli ilə yanaşı oturmuşam. Özünü təqdim etmək istəyəndə "müəllim, sizi tanıyıram" deyirəm. Hər nə qədər keçmiş deputat olsa da və indi siyasi səhnədə çox görünməsə də, Azərbaycan siyasində mühüm xidmətləri olub.
Bir müddət nə onu, nə mən danışırıq. Nəhayət, "Kənan bəy, mən az danışan adamam, amma siz danışın" deyir. Tərslikdən mən də çox danışmağı sevmirəm. Nadir təsadüfdür: siyasətçi ilə jurnalist yan- yana gəlir və heç biri danışmağı sevmir. Bir müddətdən sonra başa düşürəm ki, ən yaxşısı bəzilərinin etdiyi kimi yatmaqdır.
Bir neçə saatdan sonra Salyana çatırıq. Çay masası arxasına keçirik. Həmkarlarım kimi mən də işə başlayıram. Ağ Partiya sədri Tural Abbaslı ilə görüşürük.
- Necəsən, tələbə yoldaşım?-deyə soruşur.
Hər şeyin yaxşı olduğunu deyir, onun işləri ilə maraqlanıram.
Dialoqa "qulaq misafiri" olanlar təəccüblənirlər. Məsələ burasındadır ki, yaş fərqimiz olmasına baxmayaraq, biz BDU-nun Jurnalistika fakültəsinin magistratura pilləsini eyni ildə bitirmişik, eyni vaxtda müdafiə etmişik. Çay süfrəsi arxasında deyir ki, müəllim kimi yenidən universitetə qayıtmaq istəyir. Niyə də olmasın?
İyirmi dəqiqədən sonra yolumuza davam edirik. Füzulinin Horadiz şəhərində Azərbaycan Respublikası Minatəmizləmə Agentliyinin (ANAMA) fəaliyyətləri ilə tanış oluruq. Qurum əməkdaşı Habil Babayev deyir ki, əraziləri minalardan təmizləmək vaxt alacaq. Onun sözlərinə görə, meşəlik ərazi bu işi çətinləşdirir: ""Düşmən uzun illər ərazini ciddi şəkildə minalayıb. Buna baxmayaq, biz işlərimizi uğurla davam etdiririk",- o bildirib.
Beləliklə, siyasi partiya nümayəndələrinin birgə səfəri mina terrorunu yenidən gündəmə gətirmiş oldu.
Ümumi məlumatlar aldıqdan sonra partlamamış sursatın zərərsizləşdirilməsi prosesini izləyirik. Tanınmış ictimai- siyasi xadim, Vətəndaş Həmrəyliyi Partiyasının sədri Sabir Rüstəmxanlı prosesdə birbaşa iştirak edir, aparatın düyməsini basır. Bu əsnada onun sözlərini eşidirəm: "Mən minanı yox, ermənilərin ürəyini partladacam".
Mina partlayışının ardınca ətrafı qatı duman bürüyür.
Buradan Cəbrayıla gedirik. Yaradılan şəraitlə tanış oluruq. Yenidənqurma və abadlıq işləri ilə bağlı bilgi alırıq. Həmçinin tikiş fabrikinə də oluruq. Məlum olur ki, fabrikdə çalışanların əksəriyyəti əmək kitabçılarını burada alıblar.
Fürsətdən istifadə edib politoloq Tural İsmayılova yaxınlaşıram. Danışırıq. Deyir ki, bu gün Azərbaycanda müxtəlif siyasi partiya rəhbərləri, politoloqlar və jurnalistlər işğaldan azad edilmiş Füzuli, Cabrail və Zengilan bölgəsində müxtəlif abadlıq, bərpa və yenidənqurma prosesi ilə yerində tanış olmaqdadırlar: "Eyni zamanda ərazidə iqtisadi-sənaye zonasının fəaliyyəti ilə bağlı məlumat aldıq".
Ağ Partiya sərdi Tural Abbaslı isə dedi ki, belə səfərlər nəticəsində iqtidarla müxalifət arasındakı baryerlər aradan qalxır: ""Müxalifət və iqtidar bir-birinə düşmən gözü ilə baxmamalıdır. Burada söhbət yalnız rəqabətdən gedə bilər".
Daha sonra burada tikilən məscidə gedirik. Bir çoxu içəri keçir, dua edir. Bu günlər üçün nə qədər dua etdiyimizi xatırlayıram...
Buradan "Araz vadisi" iqtisadi zonasına gedirik. Rəsmi şəxslər bizə məlumat verirlər. Hər kəs diqqətlə dinləyir. ReAL partiyasının sədri, tanınmış iqtisadçı Natiq Cəfərli diqqətimi çəkir. Danışdıqca sanki beynində nə isə hesablayır...
...Səfər çərçivəsində Zəngilana da gedir, orada görülən işlərlə də tanış oluruq.
...Naharda çox maraqlı vaxt keçiririk. Xüsusilə çoxdan tanıdığım politoloq Aytən Qurbanova ilə Alyans TV-nin rəhbəri Abutalıb Səmədovun müzakirəsi diqqətimi çəkir. Onları dinləyirəm. Rusiya- Ukrayna müharibəsindən danışırlar. Aytən xanımın fikirləri, deyəsən, siyasətçinin xoşuna gəlir. Deyir ki, məni efirə debata çağıransa tərəf müqabilimin siz olmasını istəyərdim.
Politoloqun sözlərindən belə məlum olur ki, onun siyasətə gəlməyində Ümummilli Lider Heydər Əliyevin mühüm rolu olub. Aytən xanım Ulu Öndərdən ilhamlanıb. Bu məqam diqqətimi çəkir. Onu xeyli vaxtdır tanısam da, bunu bilmirdim.
Sonuncu müsahibim Milli Məclisin deputatı Elçin Mirzəbəyli olur. Deyir ki, işğaldan azad edilmiş torpaqlarımıza qayıdış bu torpaqların işğalına son qoyulduğu gündən başlayıb: "Azərbaycanlılar öz tarixi yurd yerlərinə Ali Baş Komandanın iti zəkası və qətiyyəti, şəhidlərin qanı, əsgər çəkmələrinin izləri ilə qayıdıblar. İndi isə bu proses vəhşi, qaniçən, vandal tayfanın viran qoyduğu yurd yerlərimizdə həyata keçirilən genişmiqyaslı bərpa-quruculuq işləriylə, misilsiz bir sürət və böyük Vətən sevgisinə bürünmüş yüksək peşəkarlıqla davam etdirilir".
...Geri qayıdırıq. Deyirdilər ki, bu gün Qarabağa yağış yağacaq. Amma, şükür, hava yaxşı idi. Bu istilik siyasi mühitdə də hiss olunurdu...
Kənan Novruzov
21:28 05.06.2025
Oxunuş sayı: 7644
