Müasir İnkişaf Birliyi - 20 il
Dəyərli dostlar!
Bu gün Müasir İnkişaf Birliyinin 20 yaşı tamam olur.
İki on illik tarix üçün uzun bir zaman deyil. Amma bu təşkilatın qurucuları olan bizlər üçün bu nəinki uzun tarixdir, hətta deyərdim ki möhtəşəm bir zaman kəsiyidir.
Təxminən iyirmi il əvvəl 20-25 yaşlı bir qrup gənc toplaşaraq türk birliyi, türk-islam ideyası, azərbaycançılıq ideologiyasını təbliğ etmək üçün Türk-İslam Birliyini təsis etdik. Təxminən doqquz aylıq müddət ərzində bu ad altında fəaliyyət göstərdik, həvəsli və ideyalı gənclər olaraq təbliğat fəaliyyətləri gerçəkləşdirdik. Əleyhimizə çıxan da oldu, bizi həvəsdən salmağa çalışanlar da tapıldı, hətta bizə qarşı cəbhə tutanlar da oldu. Lakin biz bunlara əhəmiyyət vermədik, həvəsdən düşmədik, inandığımız ideya uğrunda yolumuza davam etdik.
Sonradan Ədliyyə Nazirliyinin Kollegiyasında Müasir İnkişaf Birliyi olaraq qeydiyyata alındıq. İsrar və tələblərimizlə Nizamnaməmizdə "Türk xalqlarının əməkdaşlığı" məsələsi əsas məqsəd kimi qeyd olundu. Biz o zaman da Türk Birliyinə inanırdıq, bu gün də ona inanırıq. Beləcə 20 il ərzində Türk Birliyi, Türk-İslam ideyası uğrunda xidmətə həsr olunan yol gəldik.
Budur artıq Türk Birliyi real oldu. Budur artıq Türk Birliyi dövlətlərarası siyasətə çevrilib. Budur artıq Türk Birliyi Azərbaycan və Türkiyə dövlətləri başda olmaqla türk dövlətlərinin himayəsindədir. Demək ki, bizlər bu 20 illik yolu boşuna gəlməmişik. Demək ki, bizlər 20 ildir boşuna çalışmamışıq.
Müasir İnkişaf Birliyinin 20 illiyində bu reallıqları görməkdən, xəyal olan Türlk Birliyinin əməli fəaliyyətdə təcəssüm etdiyinin şahidi olmaqdan gözəl hiss ola bilməz.
20 yaşımızın tamam olması münasibətilə Müasir İnkişaf Birliyinin indiki və gəlmiş-keçmiş bütün üzvlərini, bizə bu fəaliyyətlərin gerçəkləşməsində dəstək olan dostlarımızı, təşkilatımızın bugünlərə gəlib çatmasında əməyi olan hər kəsi təbrik edirəm.
Mübariz Göyüşlü
Müasir İnkişaf Birliyinin sədri
18:29 05.06.2025
Oxunuş sayı: 18845
