İsveçdə keçirilən ənənəvi ATR Teatr Festivalı uğurla başa çatdı
İsveçin Vasteras şəhərində təşkil olunan və artıq illərdir teatrsevərləri bir araya gətirən ənənəvi ATR Teatr Festivalı bu il də uğurla yekunlaşıb. Festivalda İsveçin müxtəlif şəhərlərindən gələn kiçik və böyük teatr kollektivləri iştirak edərək tamaşaçılara rəngarəng teatr təcrübələri yaşadıblar.
Crossmedia.az xəbər verir ki , festivalın ikinci günü azərbaycanlı rejissor, Prezident mükafatçısı Əlif Cahangirin “Səhnədə azadlıq: Teatrda demokratik və totalitar rejissor yanaşmaları” mövzusunda təqdim etdiyi ustad dərsi böyük maraqla qarşılanıb. Təlimin nəzəri hissəsində rejissor-aktyor münasibətləri, səhnə azadlığı və yaradıcılıq sərbəstliyi kimi məsələlər ətrafında müzakirələr aparılıb. Praktik hissədə isə məşğələlər dünya teatr tarixinə damğasını vurmuş Meyerholdun “Biomexanika” texnikasına əsaslanaraq keçirilib.
Qeyd edək ki, 1981-ci ildən etibarən keçirilən ATR Festivalı İsveçin ən böyük həvəskar teatr festivalı hesab olunur. Festival teatrla məşğul olanlar üçün görüş, fikir mübadiləsi və yaradıcı inkişaf baxımından əhəmiyyətli bir platforma rolunu oynayır. Bu ilki festival çərçivəsində ümumilikdə dörd əsas seminar təqdim olunub.
Seminarların siyahısı belədir:
Andreas Sköld – “Ciddi yumor nədir?”
Anna-Jackelin Thell – “Mim nədir?”
Livet Bitch – Gənclərin icma əsaslı teatr yaradıcılığı
Əlif Cahangir – “Səhnədə azadlıq”
Xatırladaq ki, Əlif Cahangir 2015–2019-cu illərdə Azərbaycan Dövlət Akademik Milli Dram Teatrında rejissor kimi fəaliyyət göstərib. O, yazıçı Kamal Abdullanın pyesi əsasında səhnələşdirdiyi “Bir, iki – bizimki” tamaşasına görə 2018-ci ildə Humay mükafatına layiq görülüb. Tanınmış teatr rejissoru, Xalq artisti Azər Paşa Nemətovun yetirməsi olan Əlif Cahangir bu gün də yaradıcılıq axtarışlarını davam etdirir.
Ayan Sədi
16:45 03.06.2025
Oxunuş sayı: 1652
