Xurşidbanu Natəvan Akademik Milli Dram Teatrının səhnəsində
Ötən gün Akademik Milli Dram Teatrının səhnəsində “Xurşidbanu Natəvan” tamaşası yenidən nümayiş olunub.
Crossmedia.az xəbər verir ki, Tamaşanın bədii rəhbəri və quruluşçu rejissoru Xalq artisti Azər Paşa Nemətov, rejissoru Mehman Fətullayev, quruluşçu rəssamı Əməkdar mədəniyyət işçisi İlham Elxanoğlu, bəstəkarı Xalq artisti Siyavuş Kərimi, rejissor assistenti isə Dilbər İsmayılovadır.
Səhnə əsərində Xalq artistləri Məleykə Əsədova (Xurşidbanu Natəvan), Kazım Abdullayev (Canişin), Rafiq Əzimov (Mirzə Ruhullah), Hacı İsmayılov (Qoca Knyaz), Əməkdar artistlər Anar Heybətov (Knyaz Xasay), Elşən Cəbrayılov (Seyid Hüseyn), Rəşad Bəxtiyarov və Cavidan Novruz (Nəvvab), Elnar Qarayev (Mamayı), Mirzə Ağabəyli (Kor kamançaçı), Kazım Həsənquliyev (Məliküldövlə), Əlvida Cəfərov (Möhnət), Ayşad Məmmədov (Qala rəisi), Elşən Rüstəmov (Şahzadə), eləcə də aktyorlar Elçin Əfəndi (Hidayət xan), Vüsal Mustafayev (Zahir bəy), Ramin Şıxəliyev (Daşdəmir), Lalə Süleymanova (Bəyim), Məhsəti Tahirzadə (Təhminə), Rüstəm Rüstəmov (Şahmar), Tural İbrahimov (Mixaylov), Firuzə Balayeva, Corc Qafarov, Elsevər Rəhimov (kütləvi səhnələr) iştirak edirlər.
Tamaşanın mövzusu İbrahim xanın nəvəsi, sonuncu Qarabağ xanı Mehdiqulu xanın qızı, şairə Xurşidbanu Natəvanın həyatına əsaslanır.
Əsərdə Natəvan həm doğma Şuşanın, həm də ikiyə bölünmüş Azərbaycanın taleyi ilə yaşayır. Tamaşaçı onu Vətəninə və xalqına bağlı ictimai xadim, eyni zamanda həssas, zərif bir qadın və ana kimi tanıyır və sevir.
Səhnə əsərində tarixi hadisələrin fonunda xalqın taleyi, azadlığı və birliyi ideyası ön plana çəkilir. Natəvanı narahat edən əsas məsələ də məhz xalqın taleyidir.
Ayan Sədi
14:35 31.05.2025
Oxunuş sayı: 1320
