Azərbaycanın Müstəqillik Günü Tbilisidə geniş qeyd edilib
Azərbaycanın Gürcüstandakı səfirliyinin təşkilatçılığı ilə Tbilisi şəhərində 28 May – Müstəqillik Günü münasibətilə rəsmi qəbul təşkil olunub. Tədbirdə Gürcüstan Parlamentinin sədri Şalva Papuaşvili, parlamentin deputatları, elm və ictimaiyyət nümayəndələri, din xadimləri, Gürcüstanda akkreditə olunmuş diplomatik korpusun üzvləri, eləcə də soydaşlarımız iştirak ediblər.
Tədbirin keçirildiyi hotelin foyesi və zalı Azərbaycan bayraqları, milli rəmzlər və xalçaçılıq nümunələri ilə bəzədilib.
Əvvəlcə Azərbaycan və Gürcüstanın Dövlət himnləri səsləndirilib, daha sonra 28 May - Müstəqillik Gününə həsr olunan videoçarx nümayiş etdirilib.
Səfir Faiq Quliyev çıxış edərək bildirib ki, Tbilisidə Azərbaycan tarixinin ən şanlı səhifələrindən biri olan milli bayramımızın qeyd olunması xüsusi məna və rəmzi xarakter daşıyır. Gürcüstan Azərbaycan Xalq Cümhuriyyətinin adı və taleyi ilə sıx bağlı olan ölkədir.
1918-ci il mayın 28-də xalqımızın müstəqillik əzmini nümayiş etdirən İstiqlal Bəyannaməsi məhz Tbilisi şəhərində qəbul edilib. Biz fəxr edirik ki, məhz Azərbaycan xalqı müsəlman aləmində ilk demokratik respublikanın yaradılmasının müəllifi olub.
O deyib ki, iki gün öncə biz dost, qardaş Gürcüstanın milli bayramı – Müstəqillik Gününü qeyd etdik. Bu əlamətdar tarixi gün Gürcüstanda təntənəli şəkildə qeyd olundu və Gürcüstanın milli bayramı münasibətilə Prezident İlham Əliyev Gürcüstanın Prezidenti Mixeil Kavelaşvili və Baş naziri İrakli Kobaxidzeyə təbrik məktubu ünvanlanmış, xalqlarımızın rifahı, bölgəmizin sabitliyi və təhlükəsizliyi naminə Azərbaycan-Gürcüstan əlaqələrinin bütün sahələrdə genişləndirilməsi və daha da dərinləşdirilməsi istiqamətində birgə səylərimizi bundan sonra da uğurla davam etdirilməsini vurğulamışdır.
Onun sözlərinə görə, Xalq Cümhuriyyətimizin ömrü uzun olmasa da, 23 ay ərzində Azərbaycanın görkəmli ziyalıları ölkəmizin inkişafı üçün çox vacib işlər görüblər.
1991-ci ildə müstəqilliyinin bərpasına nail olarkən müasir Azərbaycan Respublikası özünün qədim dövlətçilik ənənələrinə sadiq qaldığını nümayiş etdirdi, Xalq Cümhuriyyətinin siyasi və mənəvi varisi olmaqla onun üçrəngli Bayrağını, Gerbini və Himnini qəbul etdi.
Diplomat qeyd edib ki, 1991-ci ildə əldə edilən müstəqilliyimiz 1993-cü ilə qədər formal xarakter daşımış, ölkəmiz müstəqil siyasət apara bilməmiş, idarəolunmaz vəziyyətə düşmüşdür. Məhz o illərdə Ermənistan-Azərbaycan münaqişəsi alovlanmış və torpaqlarımızın 20 faizi işğal altına düşmüşdür.
Müdrik Azərbaycan xalqı nicat və pənah yolunu məhz Ulu Öndər Heydər Əliyevin simasında gördü, onu hakimiyyətə dəvət etdi və bunun sayəsində biz ölkəmizi mümkün olan risklərdən qoruya bildik. Ulu Öndər Heydər Əliyevin şah əsəri olan müasir müstəqil Azərbaycan dövləti quruldu və sürətli inkişaf yoluna qədəm qoydu.
Bu gün Ümummilli Lideri Heydər Əliyevin siyasəti Müzəffər Ali Baş Komandan Prezident İlham Əliyev tərəfindən uğurla davam etdirilir.
Azərbaycan xalqı beşinci ildir ki, 28 May – Müstəqillik Gününü qalib xalq kimi qarşılayır. 2020-ci ildə dövlətlə xalqın şəksiz birliyi sayəsində, 44 günlük Vətən müharibəsində misilsiz igidlik göstərən qəhrəman ordumuz Müzəffər Ali Baş Komandan Prezident İlham Əliyevin rəhbərliyi altında böyük Qələbə qazanmış, 30 il ərzində həlli uzadılan münaqişəyə son qoyulmuşdur.
Tarixən Cənubi Qafqaz bölgəsinin əsas ölkələri olan Azərbaycanla Gürcüstanı çoxlu sayda sarsılmaz tellər bağlayır. Həm qədim dövrlərdə, həm də yeni çağda ölkələrimiz və xalqlarımız dəfələrlə bir-birinə yardım əli uzatmış, əsl dostluq nümayiş etdiriblər.
Onun sözlərinə görə, Vətən müharibəsində qazandığımız parlaq Qələbə bölgəmizdə yeni reallıqlar yaratmışdır. Azərbaycanın beynəlxalq səviyyədə tanınmış bütün sərhədləri boyu nəzarətinin təmin etməsi, azad olunmuş torpaqlarımızda aparılan genişmiqyaslı bərpa və yenidənqurma işlərinə başlaması dünyanın gözü qabağındadır. Bu məhz əldə edilən siyasi-iqtisadi müstəqilliyimizin nəticəsi, dövlətimizin gücünün göstəricisidir.
Azərbaycan kapitallı şirkətlərimizin Gürcüstandakı fəaliyyəti, o cümlədən vacib layihələrdə iştirakı sevindirici və qürurvericidir.
F.Quliyev bildirib ki, Prezident İlham Əliyevin müvafiq Sərəncamı ilə 2025-ci il ölkəmizdə “Konstitusiya və Suverenlik İli” elan edilmişdir.
Otuz il öncə 1995-ci ildə dövlətimizin əsas qanunu hesab edilən Konstitusiyamızın məhz Ulu Öndər Heydər Əliyevin gərgin əməyi nəticəsində hazırlanaraq qəbul edilməsi, müstəqillik tariximizin mühüm hadisələrindən birinə çevrilmişdir.
Sonra Gürcüstan parlamentinin sədri Şalva Papuaşvili çıxış edərək bildirib ki, Gürcüstan və Azərbaycanın eyni vaxtda müstəqillik elan etməsindən yüz ildən çox vaxt keçir. Bu hadisə təkcə ölkə üçün deyil, həm də regional əhəmiyyət daşıyırdı. O vaxt əcdadlarımız sivil dünyanın qabaqcıl xalqlarını təmsil etdiklərini təsdiqlədilər, çünki Gürcüstan parlamentdə mütərəqqi sosial-demokrat çoxluğu seçən ilk ölkə, Azərbaycan isə demokratik idarəçiliyə malik ilk müsəlman ölkəsi idi.
Papuaşvili qeyd edib ki, Sovet İttifaqının süqutundan sonra hər iki ölkə azadlıq, suverenlik və demokratik idarəetmənin inkişafı uğrunda mübarizə əzmi ilə yeni yola qədəm qoyub. O vaxtdan bəri ölkələrimiz arasında ikitərəfli münasibətlər dinamik şəkildə inkişaf edərək möhkəm və hərtərəfli strateji tərəfdaşlığa çevrilib.
Gürcüstan və Azərbaycan arasında dostluq və məhsuldar münasibətlər təkcə coğrafi yaxınlıq ilə bağlı deyil, həm də çağırışlarla dolu müasir dəyişən dünyada yeni və xüsusi əhəmiyyət kəsb edən çoxillik xalqlararası dostluq və əməkdaşlığa əsaslanır.
“Mən şadam ki, qanunvericilik orqanlarımız arasında əlaqələr intensiv şəkildə inkişaf edir”, – deyə Papuaşvili vurğulayıb.
Tədbir sonra konsert proqramı ilə davam edib. Marneulidən olan ifaçı Şaban Məmmədov və Tbilisidən olan gənc tarzən Ramin Pirməmmədov Azərbaycanın xalq və bəstəkar mahnılarını ifa ediblər. (Azərtac)
08:24 29.05.2025
Oxunuş sayı: 5896
