"Azərbaycan bütün məsələlərdə Pakistanı dəstəkləyib" - Deputat
Pakistan Azərbaycanın sarsılmaz dəstəyinə görə Prezident İlham Əliyevə və Azərbaycan xalqına dərin minnətdarlıq bildirdi. Baş nazir Məhəmməd Şahbaz Şərif ölkələrimiz arasında möhkəm dostluq və qardaşlığın bir daha təsdiqləndiyini vurğuladı.
Məsə ilə bağlı Milli Məclisin deputatı Müşfiq Cəfərov Croasmedia.az-a açıqlama verib. Onun sözlərinə görə, Azərbaycan və Pakistan münasibətləri dostluq və qardaşlıq prinsiplərinə əsaslanır: "Pakistan, Dağlıq Qarabağ münaqişəsinin həlli ilə bağlı Azərbaycanın ədalətli mövqeyini hər zaman qətiyyətlə dəstəkləyib. İki ölkə arasında çoxşaxəli və dərinləşən əməkdaşlıq münasibətləri mövcuddur. Bu münasibətlər yalnız siyasi deyil, həm də mədəni, humanitar və beynəlxalq platformalarda qarşılıqlı dəstəyə əsaslanır.
Azərbaycan və Pakistan arasındakı yaxın və səmimi əlaqələr ortaq mədəni irsə, regional və qlobal məsələlərə dair birgə mövqelərə, həmçinin beynəlxalq forumlarda nümayiş etdirilən əməkdaşlığa əsaslanır. Azərbaycan bütün məsələlərdə, o cümlədən Kəşmir probleminə dair, daim Pakistanı dəstəkləyib. Bu qarşılıqlı dəstək, əlaqələrin qardaşlıq xarakterini bir daha nümayiş etdirir".
Deputatın fikrincə, Pakistan Dağlıq Qarabağ münaqişəsinə dair öz qəti mövqeyini açıq şəkildə ortaya qoyub: "Bu ölkə bu günə qədər Ermənistanla diplomatik münasibətlər qurmayıb və onu dövlət kimi tanımayıb. Eyni zamanda, Pakistan Senatının Xarici Əlaqələr Komitəsi Xocalı faciəsini soyqırımı kimi tanıyaraq Azərbaycana həmrəylik nümayiş etdirib. Bu, Pakistanın beynəlxalq arenada prinsipial və açıq mövqe sərgiləyən dövlət olduğunu göstərir.
Siyasi münasibətlərlə yanaşı, Azərbaycan ilə Pakistan arasında mədəni-humanitar əlaqələr də yüksək səviyyədə inkişaf edir. Bu istiqamətdə Heydər Əliyev Fondunun Pakistanda həyata keçirdiyi layihələr xüsusi əhəmiyyət kəsb edir. 2012–2018-ci illər ərzində Fondun prezidenti Mehriban Əliyevanın təşəbbüsü və dəstəyi ilə bir sıra mühüm humanitar layihələr həyata keçirilib. Həmzə Xeyriyyə Fonduna xüsusi təchizatlı qanköçürmə və laboratoriya avadanlıqları təqdim olunub, təcili tibbi yardım avtomobili və 2000 ədəd qanköçürmə paketi verilib. Eyni zamanda, Xayber Göz Fonduna yeni blok və gözləmə otaqları tikilib, Dera İsmayıl Xan bölgəsində “Heydər Əliyev Su Təchizatı Sistemi” yaradılıb".
Deputat sonda vurğuladı ki, bundan əlavə, Peşəvar Serebral İflic və Ana–Uşaq Xəstəxanasında pulsuz tibbi müayinələr təşkil olunub: "Fond Pakistanda təhsilin inkişafına da xüsusi töhfələr verib. Rara Qızlar Məktəbi inşa olunub və Pakistanın 12 universitetində təhsil alan tələbələrə ümumilikdə 41 təqaüd təqdim edilib.
Bu gün Azərbaycan və Pakistan arasında əməkdaşlığın perspektivləri kifayət qədər genişdir. İkitərəfli gündəlikdə yer alan məsələlərlə yanaşı, regional proseslər və təhlükəsizlik sahəsində də qarşılıqlı dialoq və müzakirələr vasitəsilə əlaqələr daha da dərinləşdirilir".
Həmayıl Şükürlü
16:38 15.05.2025
Oxunuş sayı: 817
