Avrasiya İqtisadi Zirvəsinin təqdimat tədbiri keçirilib
Bu il “Yaşanabilir bir dünya üçün dialoq” mövzusu ilə 28-ci dəfə keçiriləcək Avrasiya İqtisadi Zirvəsinin təqdimatı keçirilib. Mərmərə Qrupu Strateji və Sosial Araşdırmalar Vəqfi tərəfindən mayın 7-i və 8-də təşkil olunacaq Avrasiya İqtisadi Zirvəsinə 50-yə yaxın ölkədən 300-dən çox siyasətçi, diplomat, akademik, dini lider və iş adamının qatılması gözlənilir. İstanbul Moda Akademiyasında keçirilən təqdimat tədbirində vəqfin rəhbəri Akkan Suver və İstanbul Hazır Geyim və Tikiş Məmulatları İxracatçıları Birliyinin (İHKİB) İdarə Heyəti sədrinin müavini Mustafa Paşahan toplantı ilə bağlı məlumat veriblər.
Avrasiya İqtisadi Zirvəsinin iş adamları arasında yeni əməkdaşlıqların inkişafına töhfə verdiyini bildirən Mustafa Paşahan təmsil etdiyi qurumun artıq uzun illərdir Avrasiya İqtisadi Zirvəsinə dəstək verdiyini xatırladıb.
O, İHKİB-in fəaliyyət istiqamətləri barədə məlumat verib. Tədbirlə bağlı açıqlama verən Akkan Suver deyib ki, Avrasiya İqtisadi Zirvəsi təxminən 30 ildir beynəlxalq arenada söz sahibi olan şəxsləri, o cümlədən fərqli ölkələrin mövcud və ya sabiq liderləri, siyasətə yön verən şəxslər, iş dünyası, vətəndaş cəmiyyətləri, akademiklər və dini liderlərini bir araya gətirir. Türkiyənin beynəlxalq səviyyədə ən önəmli tədbirlərindən olan bu zirvədə insanlığın qarşı-qarşıya qaldığı problemlər, fürsətlər və təhdidlər hərtərəfli müzakirə edilir.
Bildirilib ki, toplantı çərçivəsində “Qlobal liderlərin rolu” başlığı altında təşkil olunacaq paneldə beynəlxalq siyasətə yön verən liderlərin populizm və demaqogiyadan bəhrələnən yeni diplomatiya üslubu müzakirə olunacaq. (Azərtac)
04:27 26.04.2025
Oxunuş sayı: 9268
