"Xalq Teatrlarında Ustad Dərsləri" layihəsi çərçivəsində Naxçıvanda panel görüş keçirilib
"Xalq Teatrlarında Ustad Dərsləri" layihəsinin davamı olaraq Cəlil Məmmədquluzadə adına Naxçıvan Dövlət Milli Dram Teatrında "XXI əsr – Müasir Teatrın Problemləri" adlı panel görüş təşkil edilib. Tədbirdə teatr sənətinin aktual problemləri müzakirə olunub və peşəkar fikirlər səsləndirilib.
Crossmedia.az-ın məlumatına görə , panel görüşdə xalq artistləri Rza Xudiyev, Rövşən Hüseynov və Naxçıvan Muxtar Respublikasının Əməkdar artisti Səməd Canbaxşiyev çıxış edərək müasir dövrdə teatrın qarşılaşdığı çətinliklər, aktyor sənətinin inkişaf istiqamətləri və bu sahədə olan ehtiyaclar barədə fikirlərini bölüşüblər.
Tədbirin sonunda xalq teatrlarının həvəskar aktyorlarının sualları cavablandırılıb. Suallara cavab verən Naxçıvan Dövlət Milli Dram Teatrının direktoru və baş rejissoru Mir Qabil Əkbərov layihənin əhəmiyyətindən danışaraq bildirib ki, bu tədbir layihənin sonu deyil. O, gələcəkdə Naxçıvanda fəaliyyət göstərən beş xalq teatrı ilə birgə daha iri miqyaslı layihələrin həyata keçiriləcəyini vurğulayıb.
Qeyd edək ki, layihədə Babək Xalq Teatrı, Şahbuz Rayon Xalq Teatrı, Naxçıvan Şəhər Xalq Teatrı, Şərur Rayon Xalq Teatrı və Ordubad Rayon Xalq Teatrı iştirak edirdi.
Ayan Sədi
17:35 15.04.2025
Oxunuş sayı: 8750
