“Azərbaycanın uğurları təkcə Cənubi Qafqaz regionu ilə məhdudlaşmır”- Deputat
Azərbaycanın xarici işlər naziri Ceyhun Bayramov bir neçə gün əvvəl Türkiyənin “Anadolu” agentliyinə müsahibəsində deyib ki, rəsmi Bakı Türkiyə başda olmaqla dost ölkələrin dəstəyi sayəsində Qərbin planlarını puç edib.
O bildirib ki, ATƏT-in Minsk Qrupunun həmsədrləri ABŞ, Fransa və Rusiya Qarabağ probleminin həlli üçün heç bir əməli addım atmayıb:
“İşğala son qoyulması üçün Ermənistana heç bir təzyiq göstərilməyib, işğalçıya və işğaldan əziyyət çəkənə eyni cür yanaşılıb. İkinci Qarabağ müharibəsi ilə problem həll edildikdən sonra işğalla bağlı 30 ildir heç bir fəaliyyət göstərməyən Qərb ölkələri Azərbaycana təzyiq göstərməyə başlayıb. Öz ərazi bütövlüyünü təmin etdiyi üçün Azərbaycanı cəzalandırmağa çalışırlar. Onların başında Fransa və şəxsən Emmanuel Makron dayanır. BMT Təhlükəsizlik Şurasında müzakirələr keçirərək Azərbaycanı cəzalandırmaq istədilər. Avropa İttifaqında Azərbaycana sanksiya tətbiq etməyə çalışdılar”.
Nazir söyləyib ki, bu səylərin heç biri uğurlu olmayıb: “ABŞ-də də Demokratların iqtidarı dövründə Ermənistana dəstək göstərilib və 30 il ərzində işğalçıya heç nə deməyiblər. Azərbaycan ərazi bütövlüyünü təmin edəndə cəzalandırmağa və təzyiq göstərməyə çalışıblar. Amma yeritdiyimiz müstəqil xarici siyasət, başda qardaşımız Türkiyə olmaqla birlikdə dost ölkələrin dəstəyi sayəsində Qərbin planları puç olub”.
Nazirin verdiyi mesajları Crossmedia.az-a şərh edən Milli Məclisin deputatı Vüqar İskəndərli bildirib ki, hazırda dünyada baş verən proseslər, qlobal siyasi mənzərənin və geosiyasi konturların yenidən formalaşması tendensiyasını nümayiş etdirir: “Mövcud vəziyyət göstərir ki, dünya əvvəlki inkişaf modelinə əsaslanmayacaq, artıq təkcə ərazi və əhali baxımından böyük olan dövlətlər deyil, mahiyyətcə güclü və dayanıqlı olan ölkələr uğur qazanacaq. Bu kontekstdən yanaşdıqda deyə bilərik ki, Azərbaycanın son illərdə əldə etdiyi nailiyyətlər ölkə başçısı cənab İlham Əliyevin dərin siyasi bilikləri, dünya siyasətinə bələdliyi, qətiyyətli qərarları, ölkədə bərqərar olunan sabitlik və iqtisadi inkişafın nəticəsidir. Eyni zamanda, Vətən müharibəsində əldə etdiyimiz tarixi Qələbə və suverenliyimizin tam bərpası Azərbaycanın qlobal səviyyədə mahiyyətcə böyük və nüfuzlu bir dövlət olduğunu bir daha sübut etdi”.
Deputat qeyd edib ki, Azərbaycanın uğurları təkcə Cənubi Qafqaz regionu ilə məhdudlaşmır: “Ölkəmiz, Qoşulmama Hərəkatına dörd ilə yaxın müddətdə uğurla sədrliyi dövründə 120-dən artıq dövlətlə səmərəli əməkdaşlıq quraraq qlobal arenada nüfuzunu daha da möhkəmləndirib. Eyni zamanda, Azərbaycanın regional siyasətdə əsas strateji hədəfi daha geniş coğrafiyada söz sahibi olmaq və nüfuzunu artırmaqdır. Bu istiqamətdə atılan addımlar artıq öz müsbət nəticələrini verməkdədir.
Bu gün Azərbaycan qlobal miqyasda etibarlı tərəfdaş və hörmət edilən dövlətlərdən birinə çevrilib. Ölkə başçımızın, həm dövlət başçısı, həm də siyasətçi kimi yüksək nüfuzu hər bir azərbaycanlıda qürur hissi doğurur. Bu inkişaf dinamikası, eyni zamanda, ölkəmizin dostlarının sayının artmasına şərait yaradır. Azərbaycan həm Türk Dövlətləri Təşkilatında, həm də Qoşulmama Hərəkatına sədrliyi dövründə bir çox dövlətlərlə uğurlu əməkdaşlıq qurub, Avropa, Asiya, Yaxın Şərq və hətta okeanın o tayında yerləşən ölkələrlə müxtəlif sahələrdə əlaqələrini genişləndirib. Bu nailiyyətlər Azərbaycanın xarici siyasətinin uğurlarını bir daha təsdiqləyir”.
Müsahibimiz əlavə edib ki, Vətən müharibəsində qazanılan qələbədən sonra Azərbaycanın müstəqil siyasətinə qarşı çıxmağa çalışan bəzi Qərb institutları və müəyyən dövlətlər ölkəmizin uğurlu və prinsipial siyasəti fonunda çarəsiz vəziyyətə düşdülər: “Təbii ki, burada Azərbaycanın dost ölkələrinin də dəstəyi mühüm rol oynadı. Azərbaycanın dostlarının sayının və bu dostluğun keyfiyyətinin artması, ölkəmizin beynəlxalq münasibətlər sistemində etibarlı tərəfdaş imicinin formalaşması dövlətimizin daxili və xarici siyasətinin uğurlu nəticəsi kimi qiymətləndirilməlidir”.
Ləman Həsənova
12:43 15.04.2025
Oxunuş sayı: 15501
