Mərkəzi Bankdan əhaliyə növbəti xəbərdarlıq: Diqqətli olun!
Son zamanlarda bank kartlarından pulların qanunsuz şəkildə çəkilməsi ilə bağlı dələduzluq halları əhali arasında ciddi narahatlıq yaradıb. Saxta SMS-lər, fişinq hücumları və digər kibercinayətkarlıq üsulları ilə vətəndaşlar böyük maddi zərərlərlə üzləşirlər. Məsələ ilə bağlı Azərbaycan Mərkəzi Bankının Mətbuat Xidmətindən Crossmedia.az-a bildirilib ki, kart hesablarından oğurluq hallarının qarşısının alınması üçün bir sıra tədbirlər həyata keçirilməyi nəzərdə tutulur.
Mərkəzi Bankın açıqlamasına əsasən, fırıldaqçılar müxtəlif üsullardan – özlərini bank əməkdaşı kimi təqdim edərək zənglər etmək, e-poçt və ya SMS göndərmək yolu ilə kart məlumatlarını ələ keçirməyə və vəsaitlərdən qanunsuz istifadə etməyə cəhd göstərirlər. Son dövrlərdə ən çox rast gəlinən metodlar arasında saxta lotereyalar, yüksək gəlir vəd edən piramida sxemləri və onlayn alış-veriş zamanı alıcı kimi davranaraq kart məlumatlarını əldə etmə halları var. Mərkəzi Bank vətəndaşlara xəbərdarlıq edərək vurğulayıb ki, kart məlumatları, eləcə də 3D Secure xidməti vasitəsilə göndərilən şifrələr heç bir halda üçüncü şəxslərə təqdim edilməməlidir: “ Bank əməkdaşları bu cür həssas məlumatları heç vaxt kart sahibindən soruşmur. Mərkəzi Bank kart sahiblərinə onlayn əməliyyatlar üçün aşağı balanslı ayrıca debet kartlardan istifadə etməyi, həmçinin bir əməliyyat üçün maksimal limitlər müəyyən etməyi tövsiyə edir: “Bu kimi addımlar kart sahibini böyük itkilərdən sığortalaya bilər”.
Mütəxəssislər qeyd edirlər ki, müəyyən saytlarda ödəniş aparıldıqda OTP kodu göndərilməyə bilər, bu səbəbdən də kart istifadəçiləri öz hesabları üçün təhlükəsizlik parametrlərini artırmalıdırlar. Bankların kiber mühafizə sistemlərinin gücləndirilməsi ilə bağlı da konkret addımlar atıldığı bildirilib. Azərbaycan Respublikası Mərkəzi Bankının “Maliyyə bazarlarında fəaliyyətinə nəzarət edilən subyektlərdə informasiya təhlükəsizliyinin təmin edilməsinə dair Tələblər” adlı sənədi artıq hazırlanıb və 2025-ci ilin mart ayından qüvvəyə minəcək.
Bu tələblər bank və
ödəniş təşkilatlarında məlumatların oğurlanmasının qarşısını almağa yönəlib.
Mərkəzi Bank əlavə olaraq vurğulayıb ki, Maliyyə Bazarında kiber dayanıqlığın gücləndirilməsi üçün 2024-2026-cı illəri əhatə edən maliyyə sektorunun inkişaf strategiyasının icrasına başlanılıb: “Bu çərçivədə banklara kibertəhlükəsizlik tədbirlərini gücləndirmək, dələduzluğa qarşı antifraud monitorinq sistemlərini 24/7 rejimində işlətmək və müştərilər üçün mütəmadi maarifləndirmə kampaniyaları keçirmək tapşırılıb. Ödəniş xidmətlərindən təhlükəsiz istifadənin təmin edilməsi məqsədilə qabaqcıl ölkələrin təcrübələri izlənilir, qanunvericilik bazası təkmilləşdirilir. Bank bu istiqamətdə mühüm bir addım kimi “Gücləndirilmiş müştəri autentifikasiyasının tətbiqi Qaydası”nın qəbul edildiyini qeyd edib.
Həmçinin maarifləndirmə tədbirlərinin də davam edəcəyi vurğulanıb: “Ötən dövr ərzində Mərkəzi Bank və Azərbaycan Banklar Assosiasiyasının birgə əməkdaşlığı çərçivəsində ödəniş kartlarından istifadə zamanı müşahidə olunan fırıldaqçılıq halları barədə maarifləndirici video və audioçarxlar hazırlanıb və bankların sosial media hesablarında, televiziya və radio kanallarında yayımlanıb. Cari il ərzində də bu istiqamətdə işlər davam etdiriləcək”.
Mərkəzi Bank vətəndaşları ehtiyatlı olmağa və hər hansı şübhəli məqamlarla qarşılaşdıqları təqdirdə dərhal banklara və hüquq-mühafizə orqanlarına müraciət etməyə çağırıb.
Nihat Tahirov
11:51 28.01.2025
Oxunuş sayı: 12396
