Gündəm

Əziz Ələkbərli: Bizi istəməyənlər Türkiyədə Türkiyə və türk düşmənlərinin kim olduğunu göstərdilər

Türkiyə Prezidenti Rəcəb Tayyib Ərdoğanın noyabrın 8-də Azərbaycana səfəri gözlənilir. Səfər iki ölkə arasında münasibətlərin mövcud vəziyyəti, regional proseslər və gələcək əməkdaşlıq perspektivləri baxımından diqqət çəkir. Xüsusilə, bu görüşün son günlər yaranmış gərgin müzakirələrə necə təsir göstərəcəyi, Bakı və Ankara arasında siyasi dialoqun hansı istiqamətdə davam etdiriləcəyi maraq doğurur. Eyni zamanda, tərəflərin regional və qlobal gündəmdəki məsələləri müzakirə etməsi, eləcə də iki dövlətin münasibətlərinə xələl gətirməyə çalışan qüvvələrə ortaq mesaj verməsi ehtimalı diqqət mərkəzindədir.

Bəs Ərdoğanın Azərbaycana səfəri münasibətlərdəki son müzakirələrə son qoyacaqmı? Görüş zamanı hansı məsələlər ön plana çıxa bilər? Bu səfər Bakı-Ankara qardaşlığının sarsılmazlığını nümayiş etdirəcəkmi?

Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli Crossmedia.az-a açıqlamasında qeyd edib ki, Türk xalqı da, Azərbaycan xalqı da və digər türk xalqları da bir gövdənin ayrı-ayrı budaqlarıdır: “Bizi tarixin dərinliklərinə gedib çıxan vahid dəyərlər, ortaq tale, ortaq qədər birləşdirir. Amma tarix boyu bu qardaşlığı pozmaq istəyən ortaq düşmənlərimiz də həmişə olub və bu gün də var. Azərbaycan 6 il əvvəl faşist Ermənistanına və onun arxasında dayanan dünya güclərinə qarşı azadlıq savaşına qalxaraq, təkcə Azərbaycan yox, bütün Türk tarixinə qızıl hərflərlə yazılan möhtəşəm bir Zəfərə imza atdı. Bu Zəfər asan başa gəlmədi, 30 il davam edən müharibədə biz 20 mindən artıq Azərbaycan övladını şəhid verdik. Azərbaycanın bu Zəfəri bir çox Azərbaycan və Türkiyə düşmənlərini, ortaq düşmənlərimizi narahat etməyə başladı. Bizi istəməyənlər bu müharibədə Azərbaycanın yanında olan dövlətlərlə, öncə İsraillə Azərbaycanın arasını vurmağa çalışdılar, bacarmadılar. Sonra “hicab” bəhanəsi ilə Türkiyəni Azərbaycanın üzərinə qaldırmağa cəhd etdilər. Türkiyədə kifayət qədər kök salmış Türkiyəni və türkü istəməyən qüvvələr sayəsində, təəssüf ki, bu dəfə bunu qismən bacardılar. Ona görə bacardılar ki, həmin qüvvələr Türkiyənin hakim dairələrinə xeyli yaxın strukturlarda kök salmışdılar. Amma yenə yanıldılar, kimə qarşı çıxdıqlarını anlamadılar. Qalib xalqın qalib Prezidentinə qarşı çıxanlar elə xalqımızın özü tərəfindən sərt təpki ilə qarşılaşdılar”.

Əziz Ələkbərli qeyd edib ki, Azərbaycan-Türkiyə münasibətləri öz dostluq, qardaşlıq, strateji tərəfdaşlıq məcrasından çıxıb: “Və şübhə etmirəm ki, bu münasibətlər bundan sonra da yüksələn xətlə, bu dəfə daha sağlam əsaslarla inkişaf edəcək. Amma qarşı tərəf də gördü ki, Türkiyədə Türkiyə və türk düşmənləri kimdir və həmin qüvvələr zərərsizləşdirilməlidir. Əks-təqdirdə həmin qüvvələr sabah Türkiyəyə daha böyük zərər vura bilər. Məndə Türkiyə Prezidenti Rəcəb Tayyib Ərdoğanın Azərbaycana səfəri barədə heç bir məlumat yoxdur. Əgər belə bir səfər olarsa, əlbəttə, səfər çərçivəsində iki dövlətin və iki xalqın maraq dairəsinə daxil olan bütün regional və qlobal məsələlər müzakirə oluna bilər və yəqin ki müzakirə olunacaq”.

Ayhan

🖨 Çap et

19:45 05.11.2026

Oxunuş sayı: 117