Azərbaycana qarşı təxribatların dayandırılması regional sülh üçün əsas şərtdir
İran-Azərbaycan münasibətləri enişli-yoxuşlu bir dövrü geridə qoyub. Bu iki qonşu ölkə arasında zaman-zaman gərginliklər yaşanıb, müxtəlif anlaşılmazlıqlar ortaya çıxıb. Azərbaycan Xarici İşlər Nazirliyi, son günlərdə İranın sərgilədiyi bəzi davranışlarla bağlı etirazını bildirmiş, xüsusilə Laçın yolunun monitorinqi və İran yanacaqdaşıyan yük maşınlarının Qarabağa qanunsuz yolla göndərilməsindən narahatlığını bildirmişdi. Prezident İlham Əliyev yanvarın 7-də yerli televiziya kanallarına müsahibəsində bildirib ki, Azərbaycan hər zaman ərazi bütövlüyünü qoruyur və bu prinsipi heç bir zaman təxirə salmayacaq. Prezident, İranın rəsmi şəxslərinin Azərbaycana qarşı sərgilədiyi nifrət ifadələrinə də ciddi etirazını bildirərək, belə davranışların qəbuledilməz olduğunu vurğulayıb.
Bununla yanaşı, Prezident Əliyev, Ərdəbil şəhərinin mollasının Azərbaycana qarşı sərgilədiyi təhqiramiz davranışlara da diqqət çəkib. Prezident, bu mollanın cəzalandırılmasını və ən azından vəzifəsindən azad edilməsini,həmçinin İranın bu məsələ ilə bağlı Azərbaycan xalqından üzr istəməsini tələb edib.
Əlbəttə, bu məsələnin dövlət səviyyəsində həll edilməsi, münasibətlərin normallaşmasında vacib bir addım olacaq.
Azərbaycan-İran münasibətlərinin gələcək inkişafı barədə Crossmedia-ya danışan Milli Məclisin deputatı Ceyhun Məmmədov Prezident İlham Əliyevin açıqlamalarının əhəmiyyətini xüsusi olaraq vurğulayıb:
"Cənab Prezidentin yerli mediaya verdiyi müsahibəsində çox mühüm məqamlar diqqətə çatdırılıb. O, Azərbaycanın prinsipial mövqeyini bir daha aydın şəkildə ifadə edərək İranın səhv addımlarını ifşa etdi. Keçmiş dövrlərdə də İranın təxribatçı addımlarının şahidi olmuşuq. II Qarabağ müharibəsi dövründə və sonrakı dövrdə İranın Ermənistanla sıx əməkdaşlıq etdiyini görmüşük. Xüsusilə 2020-ci ildə Cəbrayılın işğaldan azad edilməsindən sonra Prezident İlham Əliyev bölgəyə səfəri zamanı Azərbaycanın dostluq körpüsü barədə xüsusilə danışdı. Amma bunun əksinə olaraq, İranın təxribatçı davranışları davam etdi”.
Deputat əlavə edib ki, İranın yük maşınlarının nömrələrini dəyişərək erməni nömrələri ilə Qarabağa qanunsuz yardımlar göndərməsi, bölgədə hərbi təlimlər keçirməsi və səfirliyə qarşı törədilən terror aktı Azərbaycan-İran münasibətlərini daha da gərginləşdirib: “Səfirliyə qarşı törədilən terror aktında da polis maşınlarının 40 dəqiqə ərzində hadisə yerinə yaxınlaşmaması və terrorçunun guya xəstə olması ilə bağlı iddialar bu məsələdə İranın məsuliyyətini artırır. Azərbaycan hər zaman prinsipial mövqeyini qoruyub və təxribatlara qarşı qətiyyətli addımlar atıb. Prezident İlham Əliyev bu məsələlərə dair Azərbaycanın qəti mövqeyini bir daha vurğuladı. Gələcək münasibətlərin inkişafı isə birbaşa İranın nümayiş etdirəcəyi mövqedən asılı olacaq. Biz ümid edirik ki, bu münasibətlər normallaşar və təxribatlar dayandırılar. Azərbaycan cəmiyyəti də İranın təxribatlarına və təhqirlərinə qarşı haqlı olaraq mənfi münasibət sərgiləyir. Prezident İlham Əliyevin də dediyi kimi, Azərbaycana qarşı düşmənçilik edən, təhdidlər səsləndirən və təxribatlar törədənlər bu hərəkətlərinə dərhal son qoymalıdırlar. Gələcəkdə bu cür fəaliyyətlərin dayandırılması, regionda sülh və sabitlik üçün vacib bir şərtdir”.
Nihat Tahirov
13:06 08.01.2025
Oxunuş sayı: 17692
