Dənizin dibindən çıxan möhür- 2 min illik sirr üzə çıxdı
Fransız tədqiqatçı Frank Qoddio və həmkarları Misirin İsgəndəriyyə şəhəri yaxınlığında Aralıq dənizinin dibindən üzərində İsgəndəriyyə mayakının təsviri həkk olunmuş bürünc möhür aşkarlayıblar.
Crossmedia.az xəbər verir ki, “The National” bu barədə məlumat yayıb.
Möhür Antirodos adasında su altında qalmış sarayın yaxınlığından çıxarılıb. Misirin Turizm və Qədim Əsərlər Nazirliyi tapıntını şəxsi möhür üzərində mayakın məlum olan ilk təsviri kimi qiymətləndirib.
Üzərindəki relyefin qədim sikkələrdəki təsvirlərlə oxşarlığına əsasən üzüyün təxminən eramızın II əsrinə aid olduğu bildirilir.
İsgəndəriyyə mayakı eramızdan əvvəl təxminən 280-ci ildə hökmdar II Ptolemeyin dövründə Faros adasında inşa edilib. Hündürlüyü 100 metrdən çox olan mayak qədim dünyanın ən hündür tikililərindən biri sayılıb və gəmilərin limana təhlükəsiz daxil olmasına xidmət edib.
Orta əsrlərdə baş verən zəlzələlər nəticəsində mayak dağılıb. XV əsrin sonunda isə Sultan Qaytbay onun yerində dağıntıların daşlarından istifadə etməklə qala inşa etdirib.
Ekspedisiyanın rəhbəri Frank Qoddionun sözlərinə görə, möhürün məhz bir vaxtlar hakimiyyət mərkəzi olmuş Antirodos adasındakı əfsanəvi sarayın yaxınlığında tapılması xüsusi əhəmiyyət daşıyır. Onun fikrincə, bu tapıntı sarayda mayakın idarə olunması ilə birbaşa əlaqəli inzibati qurumların fəaliyyət göstərdiyini göstərir.
Antirodosdakı su altında qalmış saray kompleksi eramızdan əvvəl I əsrdə Misirə səfər edən qədim yunan coğrafiyaşünası Strabonun əsərlərində də təsvir olunub.
Hazırda tədqiqatçılar İsgəndəriyyənin şərq limanında araşdırmaları davam etdirirlər. Ərazidə sarayla yanaşı, İsis məbədinin və Mark Antoniusun iqamətgahının qalıqları da yerləşir. Bu ərazidəki işlər başa çatdıqdan sonra ekspedisiya Əbu-Qir körfəzində qazıntılara başlayacaq.
13:38 08.10.2026
Oxunuş sayı: 55
