Cəmiyyət
Bir səs, yüzlərlə obraz, unudulmaz sənətkar – Elxan Əhədzadə
Bu gün Azərbaycan səhnəsinin sevilən, unudulmaz sənətkarı, Xalq artisti Elxan Yahya oğlu Əhədzadənin dünyasını dəyişdiyi gündür. Onun vəfatından illər keçsə də, səsi, obrazları və o mehriban təbəssümü hələ də ürəklərdə yaşayır.
Elxan Əhədzadə 1948-ci ilin soyuq yanvar günlərində Bakıda, musiqiçi ailəsində dünyaya göz açdı. Uşaqlıqdan sənətə bağlı böyüdü. 1967-ci ildə Cəfər Cabbarlı adına kinostudiyanın kinoaktyorluq kursunda Adil İsgəndərovun sinfində təhsil aldı. 1969-cu ildə isə Rus Dram Teatrının səhnəsinə qədəm qoydu. Orada bir çox yaddaqalan rollar yaratdı. Sonra isə ömrünün ən parlaq illərini Azərbaycan Dövlət Musiqili Komediya Teatrında keçirdi.
O, sadəcə aktyor deyildi. Gözəl bariton səsi ilə həm də vokal ifaçısı idi. Səhnədə həm gülməyə, həm də düşünməyə vadar edən obrazlar yaratdı. İ. Kalmanın “Nümunəvi qaraçı” operettasında Pali Rac, F. Leharın “Şən dul qadın”ında Danilo, Qara Qarayevin “Çılğın Qaskoniyalı” əsərində Sirano… Bu rolların hər biri onun sənətinin ayrı bir rəngi idi. Opera səhnəsində isə Üzeyir Hacıbəylinin “Leyli və Məcnun”unda Nofəl, Bizetin “Karmen”ində Eskamilo, Verdinin “Riqoletto”sunda Riqoletto kimi obrazları ilə tamaşaçıları valeh etdi.
Kino da ondan yan keçmədi. “Çətirimiz buludlardır”, “Üzü küləyə”, “Babək”, “Həyat bizi sınayır”, “Bəylik dərsi”… Bu filmlərdə canlandırdığı personajlar bu gün də yaddaşlarda qalıb. Xüsusilə “Çətirimiz buludlardır” filmindəki obrazı ilə bir çoxlarının ürəyinə yol tapmışdı.
1998-ci ildə Əməkdar artist, 2006-cı ildə isə Xalq artisti fəxri adına layiq görüldü. Amma o, heç vaxt adlarla öyünmədi. Səhnəni, tamaşaçını və sənəti hər şeydən üstün tutdu. Hətta səhhəti ağırlaşdığı günlərdə belə səhnəyə çıxmaqdan imtina etmədi.
2010-cu ilin 8 oktyabr səhəri… Bakı şəhəri bir sənətkarını əbədi olaraq itirdi. 62 yaşında… Amma sənət heç vaxt yaş bilmir. Elxan Əhədzadənin səsi, oynadığı rollar və o səmimi, mehriban siması bu gün də bizimlədir.
Allah rəhmət eləsin, məkanı cənnət olsun.
Nigar Xəlilli
12:30 08.10.2026
Oxunuş sayı: 82
