Xarici xəbərlər

Aİ Ukraynaya daha 3,3 milyard avro ayırır

Avropa İttifaqı sentyabrın 18-də Ukraynaya pilotsuz uçuş aparatları, raketlər və digər hərbi vasitələrin, o cümlədən ABŞ istehsalı “Patriot” raketlərinin alınması üçün əlavə 3,3 milyard avro ayıracaq.

Crossmedia.az xəbər verir ki, “RIA Novosti” bu barədə məlumat yayıb.

Avropa Komissiyasının sədri Ursula fon der Lyayen Ukrayna Prezidenti Volodimir Zelenski ilə telefon danışığından sonra bildirib ki, vəsait Ukraynanın müdafiə ehtiyaclarının maliyyələşdirilməsinə yönəldiləcək. Sentyabrın 11-də Avropa Komissiyası Ukraynaya hava və raket hücumundan müdafiə sistemləri, sursat, dronlar və radioelektron mübarizə vasitələrinin alınması üçün 6,1 milyard avroluq maliyyələşməni təsdiqləyib.

Fon der Lyayen həmçinin Aİ-nin SAFE proqramı çərçivəsində qalan vəsait hesabına Avropa İttifaqı ilə Ukrayna arasında müdafiə sahəsində birgə layihələr üçün yeni proqram yaradılacağını açıqlayıb. Onun sözlərinə görə, Aİ ilin əvvəlindən Ukraynaya təxminən 15 milyard avro yardım ayırıb.

Avropa Komissiyası daha əvvəl Ukraynaya “Patriot” hava hücumundan müdafiə sistemləri üçün vacib komponentlərin alınmasına imkan verən xüsusi istisnanı da təsdiqləyib. Bu çərçivədə Ukraynaya 3,2 milyard avroluq növbəti ödənişin ayrılacağı bildirilib.

🖨 Çap et

23:35 17.09.2026

Oxunuş sayı: 42