Futbol dünyası İnfantinoya qarşı birləşir
FIFA prezidenti Canni İnfantinonun gənclər turnirində iştirakına qarşı çıxılıb.
Crossmedia.az xəbər verir ki, “Sky News”un məlumatına görə, Şimali Amerika, Mərkəzi Amerika və Karib hövzəsi Futbol Konfederasiyasının (KONKAKAF) rəhbərliyi İnfantinoya məktub göndərərək Dominikan Respublikasında keçirilən turnirdə iştirakının uşaqların oyunlarına mənfi təsir göstərə biləcəyini bildirib.
Buna səbəb onun Dünya Kuboku ilə bağlı kommersiya planlarının futbol dünyasında yaratdığı narazılıqdır.
Məlumata görə, İnfantino cümə günü Karib adasına gəlib və burada FIFA ətrafında yaranan böhranla bağlı suallara cavab verməyib.
KONKAKAF prezidenti Viktor Montagliani məktubunda bildirib ki, FIFA rəhbərinin ətrafında yaranan idarəçilik böhranı mətbuat diqqətini artıracaq və bu, CFU U-14 turnirinin əsas məqsədinə kölgə sala bilər.
Montagliani İnfantinodan tədbirdə iştirakını yenidən nəzərdən keçirməsini xahiş edib və bildirib ki, onun iştirakı gənclər yarışının mahiyyətinə zərər vura bilər.
Qeyd olunur ki, İnfantino turnirə daha əvvəl dəvət olunub. Lakin FIFA-nın Dünya Kuboku ilə bağlı yeni kommersiya layihəsində özəl investorların iştirakı üçün pay satışı planları ortaya çıxdıqdan sonra vəziyyət dəyişib.
İddialara görə, FIFA rəhbərinin Dünya Kubokunun gələcək layihəsində 20 faiz payı özəl kapital şirkətlərinə satmaq planı futbol federasiyalarının narazılığına səbəb olub.
KONKAKAF, Avropa və Asiya futbol konfederasiyaları daha əvvəl İnfantinonun istefasını tələb edən birgə məktub imzalayıb. Onlar FIFA rəhbərliyi ilə futbol qurumları arasında “əsas etimad böhranı” yarandığını bildiriblər.
21:38 22.08.2026
Oxunuş sayı: 66
