Tailand XİN: Rusların qətli ölkənin turizm imicinə zərbə vurdu
Tailandın xarici işlər naziri Sihasak Phuanqketkeu Pattayada iki Rusiya vətəndaşının qətlə yetirilməsinin ölkənin turizm imicinə ciddi zərbə vurduğunu etiraf edib.
Crossmedia.az xəbər verir ki, "TASS" bu barədə məlumat yayıb.
Nazir bildirib ki, baş verən hadisə bütün Tailand cəmiyyətini sarsıdıb. Onun sözlərinə görə, Baş nazir Anutin Çanvirakun və özü Rusiyanın Tailanddakı səfiri Yevgeni Tomixinlə əlaqə saxlayaraq həlak olanların ailələrinə başsağlığı veriblər.
Sihasak Phuanqketkeu qeyd edib ki, baş nazir şəxsən hadisə yerinə gedib, hüquq-mühafizə orqanlarına cinayətkarların məsuliyyətə cəlb edilməsi barədə göstəriş verib. O, həmçinin ölkəyə gələn bütün turistlərin təhlükəsizliyinin gücləndirilməsi üçün əlavə tədbirlərin görülməsini tapşırıb.
Nazirin sözlərinə görə, Tailand dünyanın əsas turizm istiqamətlərindən biridir və belə cinayətlər turistlərin ölkəyə olan etimadını sarsıdır. O vurğulayıb ki, hökumət təhlükəsizliyi artırmaq və oxşar hadisələrin təkrarlanmaması üçün qətiyyətli addımlar atacaq.
Sihasak Phuanqketkeu əlavə edib ki, ən ciddi təhlükəsizlik tədbirləri görülsə belə, cinayətkar qruplar həmişə həssas insanlardan sui-istifadə etməyə çalışırlar və hökumət bu cür halların qarşısını almaq üçün daha çox iş görməlidir.
Qeyd edək ki, Tailand polisi iyulun 31-də 43 yaşlı Tanu Kıtthonq və 39 yaşlı Tonqçay Sinin adlı şəxsləri iki Rusiya vətəndaşının qətlində şübhəli bilinərək saxlayıb. İstintaq zamanı Kıtthonq 22 yaşlı Diana Nazimova və onun 17 yaşlı qardaşı Roman Nazimovu öldürdüyünü, meyitləri isə Pattayanın cənubundakı meşəlik ərazidə gizlətdiyini etiraf edib. İstintaqın məlumatına görə, şübhəlilər onların motosikletini ələ keçirmək məqsədilə cinayəti törətdiklərini bildiriblər. Gənclərlə əlaqə iyulun 26-da səhər saatlarında evdən çıxdıqdan sonra kəsilmişdi.
10:23 03.08.2026
Oxunuş sayı: 71
