Türkiyə və İsrail qarşı-qarşıya: Suriya poliqona çevrilir
İsrailin müdafiə naziri İsrael Katsın Türkiyəyə və Prezident Rəcəb Tayyib Ərdoğana ünvanladığı, Suriyadakı mövqelərlə bağlı sərt xəbərdarlıq ehtiva edən bəyanatı Yaxın Şərqdə diplomatiya gündəmini yenidən gərginləşdirib. Katsın “Ərdoğanın Suriyanı bizə qarşı gücləndirməsinə imkan verməyəcəyik” fikri və Ankaraya daxili məsələlərinə diqqət yetirmək tövsiyəsi iki ölkə arasında birbaşa hərbi toqquşma risklərini gündəmə gətirib. Məsələ ilə bağlı Azərbaycan Xalq Partiyasının (AXP) sədri Qiyas Sadıqov Crossmedia.az-a açıqlama verib.
Partiya sədri bildirib ki, İsrail rəsmisinin sərt bəyanatı ilk növbədə siyasi mesaj xarakteri daşıyır:
"İsrailin müdafiə nazirinin Türkiyəyə ünvanladığı sərt bəyanat, ilk növbədə, psixoloji və siyasi təzyiq xarakteri daşıyır. Bu cür açıqlamalar Yaxın Şərqdə artan geosiyasi rəqabətin və qarşılıqlı etimadsızlığın növbəti göstəricisidir. Nəzərə almaq lazımdır ki, Türkiyə NATO-nun aparıcı üzvlərindən biri və regionun ən güclü hərbi dövlətlərindən biridir. İsrail də analoji olaraq yüksək hərbi və texnoloji imkanlara malikdir. Bu səbəbdən hər iki tərəf birbaşa hərbi toqquşmanın region üçün nə dərəcədə ağır nəticələr doğuracağını yaxşı anlayır".
Q.Sadıqov vurğulayıb ki, Suriya poliqonunda lokal gərginliklər mümkün olsa da, tərəflər genişmiqyaslı müharibədən yayınacaqlar:
"Suriyada tərəflərin maraqları müəyyən məqamlarda toqquşa bilər və lokal gərginlik riski hər zaman mövcuddur. Lakin hazırkı mərhələdə Ankara ilə Təl-Əviv arasında genişmiqyaslı birbaşa hərbi münaqişə ehtimalını yüksək qiymətləndirmirəm. Proses daha çox diplomatik təzyiq, qarşılıqlı sərt bəyanatlar və dolayı rəqabət müstəvisində davam edəcək. Beynəlxalq ictimaiyyət, xüsusilə ABŞ və digər regional aktorlar da belə bir qarşıdurmanın qarşısını almaqda maraqlıdırlar. Çünki Türkiyə–İsrail hərbi qarşıdurması təkcə bu iki ölkəyə deyil, bütün Yaxın Şərqin təhlükəsizliyinə, enerji və nəqliyyat layihələrinə ciddi zərbə vura bilər. Hesab edirəm ki, mövcud vəziyyətdə emosional ritorikadan daha çox diplomatik kanalların işlək saxlanılması və regional dialoqun gücləndirilməsi vacibdir".
Fatimə Cabbarlı
14:00 30.07.2026
Oxunuş sayı: 46
