Keçmiş XİN rəhbərinin məqaləsi: Ermənistan üç strateji böhran arasında
Ermənistanın sabiq xarici işlər naziri, diplomat və Ümumerməni Diplomatlar Şurasının təsisçi üzvü Ara Ayvazyan ölkənin qarşılaşdığı əsas problemlərlə bağlı məqalə yayımlayıb.
Crossmedia.az bu barədə ˝News.am˝ -a istinadən xəbər verir.
Ayvazyan “Üç strateji böhran arasında Ermənistan” adlı məqaləsində bildirib ki, ölkə eyni vaxtda üç bir-biri ilə əlaqəli böhranla üzləşib: daxili sabitlik böhranı, regional təhlükəsizlik böhranı və qlobal nizam böhranı.
Onun sözlərinə görə, Ermənistanda siyasi qütbləşmə, regionda güc balansının dəyişməsi və beynəlxalq sistemdəki dərin transformasiya artıq ayrı-ayrı proseslər deyil, bir-birini gücləndirən amillərə çevrilib.
Daxili sabitlik böhranı
Ayvazyan qeyd edib ki, Ermənistanda daxili siyasi böhran hələ açıq vətəndaş qarşıdurmasına çevrilməsə də, yüksək siyasi qütbləşmə dövlətin dayanıqlılığı üçün ciddi risklər yaradır.
Onun fikrincə, təhlükəsizlik, xarici siyasət prioritetləri, dövlət institutlarının inkişafı və ölkənin gələcəyi kimi fundamental məsələlər üzrə cəmiyyət daxilində ortaq yanaşmanın olmaması böhranı dərinləşdirir.
Diplomat vurğulayıb ki, Ermənistanın güclü xarici strategiya formalaşdırması üçün ilk növbədə daxili sabitliyi təmin etməsi vacibdir.
Cənubi Qafqazda yeni nizam formalaşır
Ayvazyan bildirib ki, Cənubi Qafqaz sadəcə siyasi dəyişiklik mərhələsində deyil, yeni regional nizamın formalaşdığı keçid dövrünü yaşayır.
Onun sözlərinə görə, Azərbaycan son illərdə əldə etdiyi üstünlükləri uzunmüddətli siyasi təsirə çevirməyə çalışır, Türkiyə isə regionda təsir imkanlarını genişləndirmək üçün yaranmış yeni şəraitdən istifadə edir.
Məqalədə qeyd olunur ki, baş verən proseslər Rusiya və İranın da maraqlarına toxunur. Moskva Cənubi Qafqazı təhlükəsizlik məkanının bir hissəsi hesab edir, Tehran isə şimal sərhədləri boyunca strateji sabitliyin qorunmasına önəm verir.
Ayvazyan hesab edir ki, regionda gələcək sabitlik yalnız bir tərəfin üstünlüyü ilə deyil, bütün iştirakçıların maraqlarının nəzərə alındığı balanslı sistemlə təmin oluna bilər.
Cənubi Qafqaz qlobal rəqabətin mərkəzinə çevrilir
Sabiq nazirin fikrincə, regiondakı proseslər daha geniş geosiyasi dəyişikliklərin bir hissəsidir.
O bildirib ki, Cənubi Qafqaz artıq dünya siyasətinin kənarında deyil və Rusiya, Türkiyə, İran, ABŞ, Avropa İttifaqı, Böyük Britaniya, Çin, Hindistan, Körfəz ölkələri və İsrail kimi güclərin maraqlarının kəsişdiyi əsas məkanlardan birinə çevrilir.
Ayvazyan vurğulayıb ki, kiçik dövlətlər böyük güclərin rəqabətində sadəcə müşahidəçi olmaq məcburiyyətində deyil. Bunun üçün düzgün strategiya və güclü dövlət institutları lazımdır.
Ermənistan yalnız reaksiya verməməli, strategiya qurmalıdır
Diplomatın sözlərinə görə, Ermənistan qarşısında duran problemlərin həlli ayrı-ayrı addımlarla mümkün deyil. Bunun üçün milli konsolidasiya, strateji muxtariyyət və uzunmüddətli planlaşdırma sistemi yaradılmalıdır.
Ayvazyan qeyd edib ki, müasir dünyada dövlətlərin gücü yalnız hərbi imkanlar və iqtisadi resurslarla deyil, həm də idarəetmə keyfiyyəti, institutların effektivliyi və cəmiyyətin dövlətə inamı ilə ölçülür.
Məqalənin sonunda o bildirib ki, Ermənistan hazırda tarixi seçim qarşısındadır:
“Ölkə ya başqalarının qərarlarının obyekti olacaq, ya da öz gələcəyini müstəqil şəkildə formalaşdırmaq imkanını qoruyacaq”.
Ayvazyanın fikrincə, Ermənistanın gələcək mövqeyini coğrafiya deyil, dövlətin strateji düşünmək, cəmiyyəti birləşdirmək və milli maraqları qorumaq bacarığı müəyyən edəcək.
00:15 25.07.2026
Oxunuş sayı: 91
