Yaxın Şərq
Güney Azərbaycanda hüquqlar pozulur – GADTB beynəlxalq təşkilatlara çağırış etdi
İranda yaşayan azərbaycanlıların hüquq və təhlükəsizliyi ilə bağlı narahatlıqlar yenidən gündəmə gəlib. Güney Azərbaycanın tarixi və mədəni mərkəzi sayılan Təbrizdəki vəziyyət, eləcə də bölgədə azərbaycanlıların milli, mədəni və insan hüquqları ilə bağlı səsləndirilən iddialar müxtəlif ictimai və siyasi dairələrdə müzakirə olunur. Bunun fonunda Güney Azərbaycanla bağlı bəyanat yayılaraq beynəlxalq ictimaiyyətə bir sıra çağırışlar edilib.
Güney Azərbaycan Demokratik Türk Birliyinin (GADTB) Beynəlxalq Əlaqələr Departamentinin sədri Mikayıl Oyta Crossmedia.az-a açıqlamasında Təbriz və ümumilikdə Güney Azərbaycanın təhlükəsizliyi ilə bağlı ciddi narahatlığını ifadə edib.
O bildirib ki, son dövrlər bölgədə artan gərginlik, eləcə də İran hakimiyyətinin azərbaycanlılara münasibətdə həyata keçirdiyi siyasət narahatlıq doğurur:
"Güney Azərbaycanın tarixi və mədəni mərkəzi olan Təbriz, eləcə də ümumilikdə bölgə müxtəlif təhlükələrlə üz-üzədir. Uzun illərdir davam edən ayrı-seçkilik siyasəti, milli-mədəni hüquqların məhdudlaşdırılması və insan hüquqlarının pozulması ciddi narahatlıq yaradır."
M.Oyta vurğulayıb ki, Güney Azərbaycan türklərinin mübarizəsi hər hansı xalqa və ya dövlətə qarşı yönəlməyib:
"Bizim heç bir xalqla, millətlə və ya dövlətlə düşmənçilik niyyətimiz yoxdur. Məqsədimiz Güney Azərbaycanda yaşayan Azərbaycan türklərinin ana dili, milli kimliyi, mədəniyyəti və fundamental insan hüquqlarının tanınması və qorunmasıdır".
Onun sözlərinə görə, bölgədə yaşayan azərbaycanlılar uzun illərdir müxtəlif hüquq pozuntuları ilə üzləşirlər:
"Ana dilində təhsil imkanlarının məhdudlaşdırılması, mədəni hüquqlara qoyulan maneələr, sosial-iqtisadi çətinliklər, siyasi təzyiqlər və ayrı-seçkilik halları Güney Azərbaycanda yaşayan soydaşlarımızın əsas problemlərindəndir".
GADTB rəsmisi qeyd edib ki, təşkilat bütün problemlərin yalnız sülh və dialoq yolu ilə həllini dəstəkləyir:
"Biz inanırıq ki, xalqlar arasında qarşılıqlı hörmət və dialoq problemlərin həlli üçün yeganə düzgün yoldur. Güney Azərbaycan türkləri bölgəyə müharibə və qarşıdurma deyil, beynəlxalq hüquqa əsaslanan ədalətli və dinc həll yollarının gətirilməsini istəyirlər."
M.Oyta beynəlxalq ictimaiyyətə də çağırış edib:
"Beynəlxalq təşkilatları, dünya mediasını və insan hüquqları qurumlarını Güney Azərbaycanda insan hüquqları ilə bağlı vəziyyətə diqqət yetirməyə, xalqın səsini eşitməyə və dinc həll istiqamətində atılan addımları dəstəkləməyə çağırırıq".
O əlavə edib ki, Güney Azərbaycan türklərinin əsas tələbi qarşıdurma deyil, hüquq və azadlıqlarına hörmət göstərilməsidir:
"Dünya bilməlidir ki, Güney Azərbaycanda yaşayan azərbaycanlıların tələbi düşmənçilik deyil. Onlar öz milli-mədəni hüquqlarına, azadlıqlarına, ləyaqətlərinə hörmət edilməsini istəyirlər. Bizim çağırışımız sülhə, ədalətə və xalqlar arasında qarşılıqlı hörmətə əsaslanır".
Nigar Xəlilli
17:00 21.07.2026
Oxunuş sayı: 74
