Azərbaycan–Rusiya iqtisadi əlaqələrinin gələcəyi sentyabr görüşündə müzakirə olunacaq

Azərbaycan və Rusiyanın baş nazirlərinin müavinləri Şahin Mustafayev və Aleksey Overçukun sentyabr ayında keçiriləcək görüşü iki ölkə arasında iqtisadi əməkdaşlığın gələcək perspektivləri baxımından diqqət mərkəzindədir. Son dövrlərdə siyasi münasibətlərdə müəyyən gərginlik müşahidə olunsa da, iqtisadi əlaqələrin qorunub saxlanılması və qarşılıqlı maraq doğuran layihələrin davam etdirilməsi hər iki tərəf üçün aktual olaraq qalır. Görüşdə ticarət dövriyyəsinin artırılması, nəqliyyat-logistika əməkdaşlığı, investisiya layihələri və regional iqtisadi təşəbbüslərin müzakirə ediləcəyi gözlənilir.

Milli Məclisin deputatı Vüqar Bayramov məsələ ilə bağlı Crossmedia.az-a açıqlamasında qeyd edib ki, Rusiya Azərbaycanın əsas ticarət tərəfdaşlarından biridir: “Nəzərə alsaq ki, Rusiya Azərbaycanın ilk üç ticarət tərəfdaşından biri olaraq qalır, son dövrlərdə Rusiya–Azərbaycan arasında iqtisadi əlaqələrdə müəyyən zəifləmələr müşahidə olunurdu. Bu da təbii ki, ikitərəfli iqtisadi münasibətlərə öz təsirini göstərirdi. Lakin artıq planlaşdırılan görüş iki ölkə arasında iqtisadi əlaqələrin davamlı inkişafının bərpası baxımından mühüm əhəmiyyət daşıyan görüş kimi qiymətləndirilə bilər. Nəzərə alsaq ki, Azərbaycan və Rusiya qonşu dövlətlərdir, ümumilikdə Azərbaycanın xarici siyasətinin əsas istiqamətlərindən biri də region ölkələri ilə əməkdaşlığın gücləndirilməsidir. Azərbaycan sülh gündəliyinə sadiq qalaraq Ermənistanla da ticarət əlaqələrini, o cümlədən yanacaq ixracı istiqamətində bərpa edib. Bu da Azərbaycanın regionun inkişafı və iqtisadi inteqrasiyası ilə bağlı nümayiş etdirdiyi siyasi iradəni bir daha təsdiq edir”.

Deputat qeyd edib ki, bu baxımdan, Azərbaycan Rusiya ilə də əməkdaşlıq və mehriban qonşuluq siyasətini davam etdirmək niyyətindədir: “Bu kontekstdə keçiriləcək görüşdə əsas diqqətin iqtisadi məsələlərə, xüsusilə də iqtisadi əlaqələrin inkişafı istiqamətində atılacaq addımlara yönələcəyi gözlənilir. Bu müzakirələrin iki ölkə arasında münasibətlərin inkişafına müsbət təsir göstərəcəyi ehtimal olunur”.

Ayhan

🖨 Çap et

18:00 18.07.2026

Oxunuş sayı: 59