Gündəm

Azərbaycan və Özbəkistan Xəzərdə donanma yaradır: Orta Dəhlizdə yeni mərhələ

Azərbaycan və Özbəkistan Xəzər dənizində strateji əməkdaşlığın yeni mərhələsinə qədəm qoyur. İki ölkə nəqliyyat infrastrukturu və dəniz logistikasının inkişafı istiqamətində birgə layihələri davam etdirərək, “Özbəkdəmiryolkarqo” və “Azərbaycan Xəzər Dəniz Gəmiçiliyi” QSC (ASCO) arasında birgə müəssisə yaratmaq planını həyata keçirir. Bu, Xəzər dənizində birgə donanma formalaşdırmaqla yanaşı, Orta dəhliz çərçivəsində yükdaşımaların həcmini əhəmiyyətli dərəcədə artırmağa yönəlib. Bu layihə sadəcə iki ölkə arasında ticarət əlaqələrini gücləndirmir, həm də Avrasiyanın şərq-qərb yük axınlarında Azərbaycanı və Özbəkistanı daha rəqabətqabiliyyətli oyunçuya çevirir.

Mövzu ilə bağlı Crossmedia.az-a açıqlama verən nəqliyyat məsələləri üzrə ekspert Elməddin Muradlı qeyd edib ki, Azərbaycan Xəzər Dəniz Gəmiçiliyi artıq passiv fazadan aktiv fazaya keçib: “Çünki bu sahədə hazırda çox ciddi islahatlar həyata keçirilir. Rəhbərlik dəyişdirilib və əminəm ki, bunun çox müsbət nəticələri olacaq və olmalıdır da. Çünki hazırda Azərbaycanın ən böyük üstünlük verdiyi istiqamətlərdən biri məhz nəqliyyat-logistika sahəsidir. Əgər biz bu sistemi bu gün düzgün qura bilməsək, gələcək imkanlarımızı həmişəlik itirə bilərik. Özbəkistanın bu sahədə kifayət qədər böyük təcrübəsi var. Azərbaycanın da təcrübəsi az deyil. Bu potensialları qarşılıqlı şəkildə birləşdirdikdə, nəqliyyat-logistika sahəsində hər iki ölkə üçün böyük fayda verəcək layihələr həyata keçirmək mümkündür. Azərbaycan həm Avropa, həm də Asiya üçün mühüm nəqliyyat imkanları yaradan ölkədir, logistik baxımdan strateji mövqeyə malikdir. Bu sahədə məsələlərin düzgün tənzimlənməsi gələcək üçün çox böyük üstünlüklər qazandıracaq. Bu gün Şərq–Qərb və Şimal–Cənub nəqliyyat dəhlizlərinin hər birinin perspektivinə baxdıqda görürük ki, burada çox böyük imkanlar mövcuddur. Sadəcə, bu potensialı təkbaşına reallaşdırmaq həm də mümkün deyil. Məhz buna görə də bəzi ölkələrlə birgə əməkdaşlıq çərçivəsində işlər görülməlidir və Azərbaycan da hazırda məhz bu istiqamətdə addımlar atır”.

Ekspert qeyd edib ki, burada “güc birlikdədir” prinsipi ilə hərəkət edirik və bunun da müsbət tərəfləri var: “Çünki müəyyən hədəflərə çatana qədər bu dəstəyə, bu əməkdaşlığa ehtiyacımız var. Əminəm ki, tərəfdaş dövlətlərin topladığı təcrübə Azərbaycan üçün də faydalı olacaq. Logistika və nəqliyyat planlamasını bu gün düzgün qurmaq lazımdır. Çünki dünyanın yeni düzəni məhz indi formalaşır. Bu gün nəqliyyat-logistika imkanlarını necə quracaq, onları necə dəyərləndirəcəyiksə, gələcək perspektivimiz də məhz buna uyğun olacaq. Azərbaycanın Özbəkistan, Qazaxıstan, Türkmənistan, qonşu İran, Gürcüstan və Rusiya ilə çox böyük nəqliyyat-logistika imkanları mövcuddur. Bu imkanları mütləq dəyərləndirmək lazımdır. Lakin bunları təkbaşına həyata keçirmək mümkün deyil. Birgə donanmanın yaradılması isə, təbii ki, dəniz nəqliyyatının inkişafı baxımından çox böyük fayda verəcək. Xəzər dənizində fəaliyyət göstərməklə məqsədimiz yalnız bu hövzə ilə məhdudlaşmaq deyil. Daha böyük dənizlərə, okeanlara və beynəlxalq su yollarına çıxış imkanlarını genişləndirmək lazımdır. Bu gün Azərbaycanın gəmiləri beynəlxalq sularda da fəaliyyət göstərir və yalnız Xəzər dənizi ilə kifayətlənmir. Ona görə də bu imkanlar daha da genişləndirilməlidir. Yeni donanmaların və yeni gəmilərin inşası vacib istiqamətlərdəndir. Azərbaycanın gəmiqayırma sahəsində topladığı təcrübə və malik olduğu imkanlar artıq digər ölkələrin də diqqətini cəlb edir. Onlar bu potensialı görür, dəyərləndirmək istəyir və artıq dəyərləndirirlər də. Bunun Azərbaycan üçün heç bir mənfi tərəfi yoxdur. Əksinə, çox böyük üstünlüklər yaradır. Əminəm ki, Azərbaycan Xəzər Dəniz Gəmiçiliyi bu istiqamətdə görülən işləri səmərəli şəkildə davam etdirəcək və nəticədə Azərbaycan həm bu layihədən, həm də Özbəkistanla və digər tərəfdaş ölkələrlə əməkdaşlıqdan böyük uğurlar əldə edəcək”.

Ayhan

🖨 Çap et

16:00 10.07.2026

Oxunuş sayı: 50