Moskvadan sərt mesaj: TRIPP layihəsi Rusiyasız mümkün deyil
Rusiya xarici işlər nazirinin müavini Mixail Qaluzin Ermənistan üzərindən həyata keçirilməsi planlaşdırılan TRIPP layihəsinin perspektivlərinin son hadisələr fonunda qeyri-müəyyənləşdiyini bildirib.
Crossmedia.az bu barədə xarici mediaya istinadən xəbər verir.
Onun sözlərinə görə, layihənin uğurla reallaşdırılması yalnız Rusiyanın iştirakı ilə mümkün ola bilər. Qaluzin hesab edir ki, İran və Çin marşrut üzərində ABŞ-nin nəzarətini qəbul etməyəcəklər.
Rusiya rəsmisi qeyd edib ki, ABŞ və İsrailin İrana qarşı həyata keçirdiyi hücumlardan sonra Tehranın ABŞ-nin ölkənin şimal sərhədində mövcudluğuna müsbət yanaşacağı inandırıcı görünmür.
Mixail Qaluzin əlavə edib ki, TRIPP marşrutunun Ermənistan ərazisindən keçən hissəsinin Rusiya sərhədçilərinin nəzarətində olan zonadan keçməsi planlaşdırılır. Bu səbəbdən o, layihə ilə bağlı qərarlar qəbul edilərkən Rusiyanın və Avrasiya İqtisadi Birliyinin mövqeyinin də nəzərə alınmasının vacibliyini vurğulayıb.
19:28 29.06.2026
Oxunuş sayı: 53
