Kənd təsərrüfatı

Azərbaycanda toxumçuluqla bağlı ciddi problemlər var

Kənd təsərrüfatında məhsuldarlığın artırılması, ərzaq təhlükəsizliyinin gücləndirilməsi və fermerlərin yüksək keyfiyyətli toxumla təmin olunması dövlət siyasətinin əsas istiqamətlərindən biridir. Bu baxımdan Milli Məclisdə müzakirəyə çıxarılan yeni “Toxumçuluq haqqında” qanun layihəsi sahənin hüquqi bazasının müasir tələblərə uyğun yenilənməsi məqsədi daşıyır. Layihədə toxumçuluğun məqsəd və prinsiplərinin dəqiq müəyyənləşdirilməsi, toxumun keyfiyyətinə nəzarət və sertifikatlaşdırma sisteminin beynəlxalq standartlara uyğunlaşdırılması, həmçinin toxumların emalı, qablaşdırılması, etiketlənməsi və utilizasiyası ilə bağlı vahid qaydaların tətbiqi nəzərdə tutulur. Ekspertlər hesab edirlər ki, bu dəyişikliklər praktikada düzgün icra olunacağı təqdirdə fermerlərin keyfiyyətli toxuma çıxışını asanlaşdıra, məhsuldarlığın artmasına və aqrar sektorun rəqabət qabiliyyətinin yüksəlməsinə töhfə verə bilər. Bəs yeni qanun layihəsi əkinçilərin fəaliyyətinə hansı real təsirləri göstərəcək və onların qarşılaşdığı problemlərin həllinə nə dərəcədə xidmət edəcək?

Mövzu ilə bağlı kənd təsərrüfatı eksperti Vahid Məhərrəmov Crossmedia.az-a açıqlama verib:

“Qanun qəbul etməklə məqsədə nail olmaq mümkün deyil. Əsas məsələ bunu əməli şəkildə həyata keçirməkdir. Təəssüf ki, bu sahədə ciddi problemlər mövcuddur. Problemlərdən biri də odur ki, elmi mərkəzlərlə istehsal sahəsi arasında lazımi əlaqə və vəhdət yoxdur. Məsələn, Azərbaycanda toxumçuluq və seleksiya işi ilə məşğul olan güclü elmi institutlar fəaliyyət göstərməlidir. Məhz həmin institutların dəstəyi ilə müasir dövrün tələblərinə cavab verən yüksək məhsuldar toxum sortları yetişdirmək və onları rayonlaşdırmaq mümkündür. Lakin bu işə ciddi və elmi əsaslarla yanaşmaq lazımdır. Azərbaycanda toxumçuluqla bağlı ciddi problemlər var. Bu problemlərin əksəriyyəti toxum emalı ilə məşğul olan müəssisələrin sayının az olması, aralarında rəqabətin olmamasından qaynaqlanır”.

Ayhan

🖨 Çap et

15:00 26.06.2026

Oxunuş sayı: 40