ABŞ İrana qarşı sərt siyasət yürütmək niyyətindədir
Qərb dövlətləri və ABŞ bölgədəki dövlətlərə, hakimiyyət orqanlarına təzyiq göstərərək bölgədə hakim qüvvəyə çevrilmək istəyirlər. Bu siyasət ABŞ-ın uzun müddətdir apardığı siyasətdir. Saxta demokratiya bayrağı altında İraqı və Əfqanıstanı qarışdırdılar. Hazırda isə Gürcüstandakı prezident və parlament seçkilərinə təsir göstərməyə çalışırlar. Nəzərə almaq lazımdır ki, həm də Suriyada vəziyyət olduqca gərgindir və siyasi böhran mövcuddur. ABŞ bölgədəki siyasətini yavaş-yavaş həyata keçirir. Bəs növbədə münasibətləri olduqca gərgin olan İran İslam Respublikası və İraq ola bilərmi? Burada ABŞ-ın hakimiyyətə təsir göstərməsi nə qədər real görünür?
Mövzu ilə bağlı politoloq Elçin Xalidbəyli Crossmedia.az saytına açıqlama verib:
"Dünyada ikinci Dünya müharibəsindən sonra formalaşmış beynəlxalq hüquq sistemi artıq öz əhəmiyyətini itirmişdir. Yeni dünya nizamının yaradılması uğrunda mübarizə aparılır. Bu mübarizə, təbii ki, həm Yaxın Şərq regionuna, həm də Cənubi Qafqaza birbaşa təsir göstərir. Hazırda Yaxın Şərqin yenidən dizayn edilməsi prosesi böyük sürətlə davam edir. Bu prosesdə Türkiyəyə yer vermək istəmirdilər. Lakin Türkiyə çevik manevrlər etməklə digər dünya güclərinə göstərdi ki, Türkiyəsiz Yaxın Şərqi yenidən dizayn etmək mümkün deyil. Hazırda Türkiyə Suriyanın gələcək taleyinin həllində əsas güc mərkəzinə çevrilmişdir. Hətta ABŞ-ın yeni prezidenti Donald Tramp Türkiyəni hərbi-siyasi güc kimi qəbul edib və Suriyadakı siyasi iradəsini etiraf etmişdir. Bu o deməkdir ki, Yaxın Şərqdə baş verən hadisələrdə Türkiyənin siyasi iradəsi mütləq nəzərə alınır".
Politoloq İran və İraqa ABŞ və Qərbin nə dərəcədə təsir göstərə biləcəyindən danışıb:
"Yaxın Şərqin yenidən dizayn olunması kontekstində İraq və İran məsələsinə, İraqla bağlı hansısa ciddi addımın atılması o qədər də inandırıcı görünmür. İraqda ABŞ-ın qurduğu bir hakimiyyət mövcuddur və bu ölkəyə ABŞ nəzarət edir. Ancaq İranla bağlı ABŞ-ın və Qərbin mövqeyi hazırda neqativdir.
Yaxın Şərq böhranının nizamlanmasında, daha doğrusu, Yaxın Şərqdə yeni nizamın qurulmasında İranın bölgədəki böyük ölçüdə proksi qüvvələri sıradan çıxarılıb. İndi İranın bu regionda manevr imkanları həddindən artıq məhdudlaşdırılıb. Suriya ilə bağlı proseslərin ardınca İrana qarşı müəyyən təzyiqlərin göstərilməsi ehtimalı yüksəkdir. Yaxın Şərqdə bundan sonrakı proseslərin necə inkişaf edəcəyini isə Tramp administrasiyasının fəaliyyətə başlamasından sonra daha dəqiq görə biləcəyik. Donald Trampın verdiyi açıqlamalardan belə məlum olur ki, ABŞ İrana qarşı sərt siyasət yürütmək niyyətindədir. Bu siyasətin İranı hansı səviyyədə sıxışdıracağı və ya İranla bağlı hansı addımların atılacağı yaxın aylarda daha dəqiq məlum olacaq".
Ayhan Ağarzayev
12:01 20.12.2024
Oxunuş sayı: 7535
