İranda acların üsyanı başlayır: Üfüqdə süqut görünür
İran parlamentində səsləndirilən yeni təklif beynəlxalq ictimaiyyətin diqqətini cəlb edib. Deputatlar ölkənin raket potensialının genişləndirilməsi məqsədilə ABŞ-ni hədəf ala biləcək qitələrarası ballistik raketlərin hazırlanmasına yaşıl işıq yandırılması üçün ali rəhbər Əli Xameneiyə müraciət ediblər.
Müraciət İranın müdafiə strategiyası ilə bağlı müzakirələrin daha da qızışdığı bir dövrə təsadüf edir. Mütəxəssislər bildirirlər ki, belə silahların hazırlanması ilə bağlı qərar yalnız region üçün deyil, qlobal təhlükəsizlik və beynəlxalq münasibətlər baxımından da mühüm nəticələr doğura bilər.
Məsələ ilə bağlı keçmiş maliyyə naziri Fikrət Yusifov Crossmedia.az-la öz fikirlərini bölüşüb: "İran ətrafında baş verən prosseslər bir daha sübut edir ki, belə bir rejimlə idarə olunan dövlətə nüvə silahı, uzaqvuran ballastik raketlər istehsalına imkan vermək olmaz. Bu gün biz ABŞ-la müharibə müstəvisində İranın Fars körfəzi ətrafında yerləşən ölkələrə qarşı raketlərdən və pilotsuz uçuş aparatlarından istifadə etməsinin hansı nəticələrə gətirib çıxardığını gördük. Qərb, başda ABŞ olmaqla dini fanatizmi xəstəliyinə tutulmuş bir hökumətin belə qorxulu silahlara yiyələnməsindən əndişəlidir. İran molla rejimi artıq 50 ilə yaxındır ki, " biz İsraili yer üzündən siləcəyik" deyib, qlobal bir müharibəyə hazırlaşırdı. Nəhayət, bu müharibə baş verdi və müharibə İranın hərbi sahədə müasir hərbin tələblərindən çox geridə qaldığını göstərdi. Baxın, 40 günlük bombardmanla ABŞ-İsrail cütlüyü İranın hərbi sənayesini necə bir iflic halına saldı. Bu gün isə İran yeni bir daxili qarşıdurmanın astanasındadır. Hörmüz boğazının ABŞ tərəfindən bağlanması nəinki İran neftinin ixacını dayandırıb, bu addım eyni zamanda İranın xarici ticarət əməliyyatlarının 80%-ə qədərini iflic halına salıbdır. İran bu gün neft və qaz da daxil olmaqla nə idxal nə də ixrac əməliyyatları apara bilir. Bu durumun ölkə daxilində yaratdığı vəziyyət isə ortadadır. Son bir ay ərzində İranda ərzaq və digər istehlak mallarının qiymətləri fantastik səviyyədə yüksəlibdir və bu prosses sürətlə davam edir. Elə istehlak məhsulları var ki, onların qiymətləri 10 dəfəyə qədər artıbdır. Təsəvvür etmək belə çətindir ki, insanlar bu qədər ağır maliyyə yükünü necə daşıya bilərlər? Başqa bir sual isə odur ki, insanlar bu məşəqqətə nə qədər dözə biləcəklər? Bir sözlə, "İranda acların üsyanı yetişir" desək yanılmarıq.. Biz tarixdə acların üsyanları barədə az eşitməmişik. İndi isə bunu qonşu İranın timsalında görmək ərəfəsindəyik. İranın bu durumuna hansı prizmadan baxılmasından asılı olmayaraq, qarşıda ölkənin böyük bir fəlakətlə üz-üzə qalacağı qaçılmazdır. Bu fikirləri belə kəskin şəkildə ifadə etməyimin əsas səbəbi budur ki, bu gün İranı idarə edən SEPAH rəhbərliyi tutduğu mövqedən heç vaxt geri çəkilməyəcək və sona qədər mübarizə aparmağa çalışacaqş Bu son isə çox yaxındır. Belə bir durumda ABŞ-ni vurmağa çatan raketlərin istehsalı barədə nağıllar uydurmaq üçün xəstə olmaq lazımdır".
12:23 08.06.2026
Oxunuş sayı: 47
