Xarici xəbərlər

ABŞ–İran razılaşmasının mümkün detalları məlum olub

“Əl-Cəzirə”nin Tehran üzrə müxbiri Əli Haşem ABŞ və İran arasında müzakirə olunan mümkün anlaşmanın bəzi detallarını açıqlayıb.

Crossmedia.az bu barədə xarici mediaya istinadən xəbər verir.

Məlumata görə, tərəflər arasında nəzərdən keçirilən razılaşma Livan da daxil olmaqla bütün regional cəbhələrdə müharibənin dayandırılması və genişmiqyaslı atəşkəsi ehtiva edir. Plan çərçivəsində İranın xaricdə dondurulmuş milyardlarla dollarlıq aktivlərinin bir hissəsinin azad edilməsi də nəzərdə tutulur.

Bildirilir ki, ABŞ-nin İrana tətbiq etdiyi dəniz blokadasının ləğvi, həmçinin Hörmüz boğazının İranın nəzarəti altında mərhələli şəkildə açılması məsələləri də müzakirə olunur. Ödəniş və tranzit mexanizmləri ilə bağlı yekun razılığın isə hələ məlum olmadığı qeyd edilir.

Razılaşmanın digər bəndlərinə ABŞ qüvvələrinin Yaxın Şərqdə sayının azaldılması, 60 günlük atəşkəs rejiminin tətbiqi və İranın neft ixracına yenidən icazə verilməsi daxildir.

Eyni zamanda, İranın zənginləşdirilmiş uran ehtiyatlarının məhv edilməsi və ya ölkədən çıxarılması məsələsinin texniki heyətlər səviyyəsində ayrıca müzakirə ediləcəyi bildirilir.

🖨 Çap et

11:10 24.05.2026

Oxunuş sayı: 54