Bakıda kritik görüş - NATO rəsmisi regionda nələri müzakirə edəcək?
NATO baş katibinin Cənubi Qafqaz və Mərkəzi Asiya üzrə xüsusi nümayəndəsi Kevin Hamiltonun Azərbaycana planlaşdırılan səfəri regionda təhlükəsizlik və geosiyasi proseslər baxımından diqqət çəkən hadisələrdən biri hesab olunur.
Son dövrlərdə Azərbaycanın NATO ilə əməkdaşlığı, xüsusilə kibertəhlükəsizlik, hərbi təlimlər və müdafiə sahəsində standartların uyğunlaşdırılması istiqamətində müzakirələr daha da aktuallaşıb.
Bununla yanaşı, Ermənistan-Azərbaycan münasibətləri, sülh prosesinin gələcəyi, regionda sabitliyin qorunması və Cənubi Qafqazın geosiyasi əhəmiyyəti də əsas müzakirə mövzuları sırasında ola bilər.
Xüsusilə, Qərb və Rusiya arasında təsir mübarizəsinin davam etdiyi bir dövrdə NATO rəsmisinin Bakıya səfəri beynəlxalq diqqətlə izlənilir.
Sizcə, bu səfər zamanı hansı əsas məsələlər müzakirəyə çıxarıla bilər və NATO-Azərbaycan münasibətlərində yeni mərhələnin başlanğıcı ola bilərmi?
Mövzu ilə bağlı politoloq Ramiyyə Məmmədova Crossmedia.az-a açıqlama verib:
“Bu həm təlimlərlə, həm də Ceyhun Bayramovun Antalya Forumunda Hamiltonla görüşündə müzakirə olunan kibertəhlükəsizlik və NATO standartlarına keçid məsələləri ilə bağlıdır.
Azərbaycanın müxtəlif sahələrdə NATO ilə əməkdaşlığı və təhlükəsizlik sahəsində inteqrasiyası əsas müzakirə mövzularından biridir. Digər tərəfdən, Ermənistan-Azərbaycan münasibətləri, postmünaqişə dövründə sülh müqaviləsinin bağlanması, münaqişənin tam başa çatması, regionda sabitlik və təhlükəsizlik məsələləri də gündəmdədir”.
Politoloq qeyd edib ki, eyni zamanda, bu gün Cənubi Qafqaz Rusiya ilə Qərb arasında geosiyasi rəqabət zonası olaraq qalır:
“Region həm Qərb, həm də Rusiya üçün strateji əhəmiyyət daşıyır və burada güc balansının hansı tərəfin xeyrinə dəyişəcəyi mühüm məsələdir.
Təbii ki, NATO ilə Azərbaycanın kibertəhlükəsizlik sahəsində əməkdaşlığı istiqamətində də ciddi işlər görülür. Hesab edirəm ki, bütün bu məsələlər bugünkü müzakirələrin əsas mövzuları olacaq.
Qərbin Azərbaycana marağı yalnız NATO-nun genişlənməsi ilə bağlı deyil, eyni zamanda regiondakı gələcək layihələr, təhlükəsizliyin təmin olunması, sülhün bərqərar olması və ölkələr arasında münasibətlərin tam normallaşması ilə də əlaqədardır”.
Ayhan
11:48 11.05.2026
Oxunuş sayı: 58
