Xaricdə yaşayan ermənilər parlament seçkilərində səs verə bilməyəcəklər
Xaricdə daimi yaşayan Ermənistan vətəndaşları yalnız ölkəyə gələrək şəxsən iştirak etdikləri halda parlament seçkilərində səs verə biləcəklər.
Crossmedia.az xəbər verir ki, bu barədə TASS-a Ermənistan Mərkəzi Seçki Komissiyasının mətbuat katibi Seda Qukasyan məlumat verib.
Onun sözlərinə görə, 2012-ci ildə Seçki Məcəlləsinə edilən dəyişikliklərdən sonra Ermənistanın xaricdəki diplomatik nümayəndəliklərində seçki məntəqələrinin fəaliyyəti dayandırılıb.
“Ermənistan vətəndaşı yalnız ölkə qanunvericiliyinə uyğun olaraq Ermənistan ərazisində fiziki şəkildə mövcud olduqda səs verə bilər”, – deyə MSK sözçüsü bildirib.
Qeyd olunub ki, diplomatik xidmətdə çalışan Ermənistan vətəndaşları, xaricdə uzunmüddətli ezamiyyətdə və ya təhsil alan hərbi qulluqçular, eləcə də onların səsvermə hüququ olan ailə üzvləri üçün istisna tətbiq edilir. Həmin şəxslər elektron səsvermə hüququna malikdirlər.
Ermənistanda növbəti parlament seçkiləri iyunun 7-də keçiriləcək. Seçkilərdə iştirak üçün 19 siyasi qüvvə, o cümlədən 17 partiya və 2 blok müraciət edib.
09:46 11.05.2026
Oxunuş sayı: 46
