Sosium

Əməkhaqqının artması iqtisadiyyata müsbət təsir göstərə bilər

Minimum əməkhaqqının artırılması, əhalinin alıcılıq qabiliyyətini artırmaqla daxili tələbatın stimullaşdırılmasına kömək etsə də, bu qərar işgüzar mühitdə istehsal xərclərinin yüksəlməsinə və inflyasiya təzyiqlərinin artmasına yol aça bilər. Eyni zamanda, əməkhaqqı artımı işçilərin sosial rifahını yaxşılaşdırsa da, işəgötürənlər üçün xərclərin miqdarını artırır.

Mövzu ilə bağlı iqtisadçı ekspert Xalid Kərimli Crossmedia.az-a verdiyi açıqlaması zamanı bildirib ki, minimum əməkhaqqının artırılması həm sosial ədalətin təmin olunması, həm də əhalinin alıcılıq qabiliyyətinin yaxşılaşdırılması baxımından vacibdir:

“Artımın daxili istehlak bazarında tələbin artmasına və ümumi iqtisadi fəallığın güclənməsinə səbəb olacağı gözlənilir. Lakin, bu dəyişiklik kiçik və orta bizneslər üçün əlavə maliyyə yükü yarada bilər”.

X.Kərimli həmçinin vurğulayıb ki, minumum əməkhaqqının artırılması yalnız həmin məbləği alan işçiləri deyil, digər əməkhaqqı qruplarını da təsir edə bilər. Onun sözlərinə görə, bu maaş fərqlərinin qorunması məqsədilə digər artımlar tətbiq oluna bilər ki, bu da bizneslərin xərclərini və vergi ödənişlərini artıracaq:

“Əməkhaqqının artması iqtisadiyyata müsbət təsir göstərə bilər, amma artan tələbatla yanaşı qiymətlərin yüksəlməsi riski də mövcuddur. Beləliklə, mərhələli artım iqtisadi balansın qorunması üçün daha optimal bir yanaşma olacaq” , -deyə ekspert bildirib.

Aytac Bəhruzqızı