Ekstremal idman növləri: Azərbaycanda mövcud durum – Ekspertdən AÇIQLAMA
Son illərdə dünyada xüsusi idman növlərinə maraq sürətlə artmaqdadır. Sörf, qaya dırmanışı, ekstremal idman növləri və espor kimi sahələr ənənəvi idman növləri ilə yanaşı, müasir həyat tərzini əks etdirərək yeni nəsillərin diqqətini cəlb edir. Bu növlər təkcə əyləncə və macəra deyil, həm də sağlam həyat tərzinin təcəssümü kimi qəbul edilir.
Mövzu ilə bağlı Crossmedia.az-a danışan idman eksperti Kənan Məstəliyev qeyd edib ki, ekstremal idman növlərində Azərbaycanın uğurları məhduddur:
“Xüsusi idman növlərində vəziyyət fərqlidir. Bəzi növlərdə müəyyən irəliləyiş var, amma ekstremal idman növlərində bu irəliləyiş daimi deyil, mütəmadi inkişaf görmürük. Hələ ki, bu sahədə böyük addımlar atılmayıb”.
Ekspert həmçinin Gənclər və İdman Nazirliyinin idmanın kütləviləşdirilməsi istiqamətində səylərini yüksək qiymətləndirib:
“Nazirlik gənclər arasında idmanın populyarlaşdırılması üçün vacib işlər görür. Prezident İlham Əliyev də idmanın yalnız Olimpiya uğurları deyil, sağlamlıq və sosial layihə kimi əhəmiyyətini daim vurğulayır. Nazirliyin təşkil etdiyi marafonlar və digər tədbirlər bu istiqamətdə atılan müsbət addımlardır”.
Xüsusi idman növlərinin durumu
Kənan Məstəliyev bir neçə xüsusi idman növünün vəziyyəti barədə məlumat verib.
Qaya dırmanışı:
“Qaya dırmanışının inkişafında bəzi layihələr var. Məsələn, ölkə daxilində zirvələrin fəthi və Heydər Əliyev zirvəsi kimi yerlərdə təbliğat işləri görülür”.
Sörf və yelkən idmanı:
“Azərbaycanda sörf və yelkən idmanının geniş inkişafı çətin görünür. Abşeron yarımadasında bunun üçün kifayət qədər su hövzələri yoxdur. Buna baxmayaraq, Yelkən Federasiyası yerli idmançıların inkişafına yönəlmiş işlər görür və qarşıdakı illərdə uğurların əldə ediləcəyi gözlənilir”.
Espor:
“Elektron idman Azərbaycanda sürətlə populyarlaşır. Gənclər arasında bu sahəyə böyük maraq var. 2024-cü ilin əvvəllərində açılmış GMT Arena bu istiqamətdə atılmış vacib addımlardan biridir”.
Gənc nəsillərin marağı
Ekspert bildirib ki, xüsusi idman növləri əsasən gənclər arasında populyardır:
“Azərbaycan əhalisinin əksəriyyəti gənclərdən ibarətdir. Bu, ölkənin xüsusi idman növlərində uğur qazanması üçün əlverişli imkan yaradır. Nazirlik də bu sahədə fəaliyyətini davam etdirir”.
Xüsusi idman növlərinin inkişafı həm beynəlxalq uğurlar, həm də sağlam həyat tərzinin təbliği baxımından vacibdir. Gənclərin bu sahəyə olan marağı isə Azərbaycanın bu idman növlərində gələcək perspektivlərini daha da gücləndirir.
Saida Ramazanova
08:58 10.12.2024
Oxunuş sayı: 4148
