Türkiyə də Yaxın Şərqdəki müharibəyə qoşulur? - Açıqlandı
İsrail son günlərdə İran ərazisinə hava zərbələri endirib, paytaxt Tehrandakı və digər şəhərlərdəki digər strateji obyektlər hədəfə alınıb. Belə ki, partlayış səsləri ölkənin müxtəlif hissələrində eşidilib və bölgədə gərginlik artıb. İran cavab olaraq raket və dron hücumları həyata keçirib, bu da Dubay səmasında hərbi hərəkətləri görünən edib. Qeyd edək ki, hücumlar nəticəsində İran lideri Əli Xamenei öldürülüb, regionda şok effekti yaranıb. Bu vəziyyət digər ölkələrdə böyük qorxu yaradıb, müharibənin genişlənib başqa ölkələrə elan ediləcəyi və İsrailin Türkiyəyə hücum edib etməyəcəyi sual altına düşüb.
Bu barədə professor, siyasi elmlər doktoru Sabir Məmmədli Crossmedia.az-a danışıb: "Hazırkı vəziyyətdə İsrail, ABŞ və İran arasında baş verən müharibənin gedişində siyasi proseslərə diqqət yetirdikdə bir çox region ölkələrinin müharibədən ciddi narahat olduğunu görə bilərik. Sözsüz ki, hər kəsi düşündürən bir sual var: Yaxın gələcəkdə İsrail və Türkiyə arasında olan gərginlik pik həddə çata bilərmi? Lakin indiki vəziyyətdə Türkiyənin xarici siyasəti kifayət qədər balanslaşdırılmışdır. İstər ABŞ, istərsə də region ölkələri ilə olan münasibətlər əsas vermir ki, İsrail-Türkiyə ziddiyyəti yaransın".
S. Məmmədlinin fikrincə, Suriya ilə əlaqədar olaraq iki ölkə arasında münasibətlər gərgin olsa da, silahlı hərbi qarşıdurmaya gətirib çıxaran həddə deyil: "Türkiyə bütün addımlarını ABŞ ilə bölüşür və Donald Tramp administrasiyası ilə Türkiyə rəhbərliyinin kifayət qədər sıx əlaqələri var. Türkiyə Prezidenti Rəcəb Tayyib Ərdoğan Suriyada ABŞ-nin neft çıxarma və təbii resurslardan istifadə edilmə proseslərinə cəlb edir. ABŞ şirkətləri də həmçinin bu prosesdə iştirak edirlər".
O, əlavə edib ki, Qəzza bölgəsi həm dünya ictimaiyyətində, həm də siyasi səhnədə bir qədər kənara çəkilmiş kimi görünür: "Çünki İsrail əsasən öz məqsədlərinə nail olub. İndi isə bu prosesdə söz sahibi ABŞ-dir. Türkiyə ilə İsrail arasında müəyyən uzlaşmayan məsələlər var. Amma bu, həyati toqquşmaya gətirəcək səviyyədə deyil".
Fatimə Məmmədova
13:58 02.03.2026
Oxunuş sayı: 828
