Brüsseldə III Beynəlxalq Şahmat Turniri keçirilib
Belçikanın paytaxtı Brüsseldə “Dostluq qazansın” şüarı ilə III Beynəlxalq Şahmat Turniri keçirilib. “Fireland” Azərbaycanlılar Birliyinin təşkilatçılığı və Azərbaycan Respublikasının Belçika Krallığındakı Səfirliyinin dəstəyi ilə baş tutan turnir 15 ölkədən 50-yə yaxın şahmatçını bir araya gətirib.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb.
Tədbirdə müxtəlif ölkələrin səfirliklərinin nümayəndələri, Belçikada fəaliyyət göstərən şahmat məktəblərinin təmsilçiləri, eləcə də Belçika universitetlərində təhsil alan xarici tələbələr və Azərbaycan icmasının üzvləri iştirak ediblər.
Tədbirin rəsmi hissəsində “Fireland” Azərbaycanlıları Birliyinin həmtəsisçisi Elşən Tağıyev təşkilat və turnir haqqında müfəssəl məlumat verib. O, ildən-ilə iştirakçı sayının və təmsil olunan ölkələrin sayının artmasını turnirə böyük marağın təzahürü kimi qiymətləndirib.
Azərbaycanın Belçikadakı Səfirliyinin birinci katibi Emin Rüstəmov isə çıxışında Belçikada fəaliyyət göstərən Azərbaycan diaspor təşkilatlarının təşkil etdiyi bu kimi layihələrin icmalar arasında dostluq və mədəni əlaqələrin inkişafı nöqteyi-nəzərindən vacibliyini vurğulayıb.
Anderlext Bələdiyyəsinin Şahmat Klubunun üzvü Sedrik Sohet (Cedric Sohet) iştirak etdiyi 40-dan çox turnir arasında bu turnirin ən yaddaqalan olduğunu deyib. “İlk dəfədir bu qədər çox şahmat həvəskarının bir araya gəldiyinə şahid oluram,” – deyə o əlavə edib.
Turnirdə Belçika, Fransa, Meksika, Rumıniya, Qazaxıstan və İndoneziyanı təmsil edən iştirakçılar müxtəlif kateqoriyalar üzrə qalib adını qazanıblar. Qaliblər kubok, sertifikat və hədiyyələrlə, bütün iştirakçılar isə sertifikat və medallarla mükafatlandırılıblar.
Uğurlu təşkilatçılıq və turnirin miqyasının genişlənməsi fonunda Fireland Şahmat Klubunun üzvləri bu il Brüsseldə keçiriləcək digər beynəlxalq şahmat yarışına dəvət olunublar.
11:48 24.02.2026
Oxunuş sayı: 1315
