İsrail-Hizbullah münaqişəsi yenidən alovlanır: Livan sərhədində gərginlik artır
Yaxın Şərqdə təhlükəsizlik vəziyyəti yenidən gərginləşməkdədir. İsrail və Hizbullah arasında 2024-cü ilin noyabrında əldə olunmuş atəşkəs razılaşmasına baxmayaraq, tərəflər arasında qarşıdurmalar davam edir. Xüsusilə İsrailin Livanın cənubunda Hizbullah mövqelərinə endirdiyi aviazərbələr bölgədə hərbi və siyasi gərginliyi daha da artırır. İsrail bu əməliyyatları atəşkəs razılaşmasının pozulmasına cavab kimi əsaslandırır və Hizbullahın hərbi infrastrukturunun bərpasına yönəlmiş cəhdlərini təhlükə kimi qiymətləndirir.
Mövzu barədə Crossmedia.az-a danışan Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan bildirib ki, Livan ərazisində Hizbullah mövqelərinin hədəfə alınması yeni hadisə deyil: "İsrail hökuməti dövlətin təhlükəsizliyini təmin etmək məqsədilə HƏMAS-ı, eləcə də Fələstindəki digər silahlı qruplaşmaları neytrallaşdırdıqdan sonra Hizbullahı da tərksilah etməyi qarşısına məqsəd qoyub. Hizbullah liderləri və ayrı-ayrı aparıcı şəxslərinin öldürülməsi də bu məqsədə xidmət edir".
Siyasi şərhçi əlavə edib ki, Hizbullah eyni zamanda Livanla İsrail arasında münasibətlərin gərgin qalmasına səbəb olur:"İsrail hesab edir ki, Livanla yəhudi dövləti arasında sərhədlərin delimitasiya və demarkasiyasının yarımçıq qalmasının əsas səbəbkarı Hizbullahdır. Hizbullah bu ərazilərdən davamlı olaraq İsrail ərazisinə hücumlar edib, buna görə də İsrail bu məsələni birdəfəlik həll etməyi qarşısına məqsəd qoyub. Livan hökuməti də Hizbullahın tərksilahının tərəfdarıdır, hətta bununla bağlı İran tənqid olunur. İsrailin bu məsələdə əsas hədəfi Hizbullahın tərksilah olunması, sərhədlər yaxınlığında hər hansı silahlı qruplaşmanın yerləşdirilməsinin qarşısının alınması və onun tamamilə neytrallaşdırılmasıdır".
Mehriban Yariyeva
11:09 04.02.2026
Oxunuş sayı: 504
