Daha yaxşı oyunun olması üçün oyunçu keyfiyyəti də vacibdir - MÜSAHİBƏ
Azərbaycan futbol milli komandası, Azərbaycanı beynəlxalq futbol yarışlarında təmsil edən komandadır. Komanda 1992-ci ildə müstəqillik əldə etdikdən sonra beynəlxalq arenada iştirak etməyə başlayıb. Böyük turnirlərdə (FIFA Dünya Çempionatı və UEFA Avropa Çempionatı) iştirak etməmiş olsa da, Azərbaycan millisi regional səviyyədə mübarizə aparıb və zaman-zaman güclü rəqiblərə qarşı yaxşı nəticələr əldə edib. Komanda, Bakıdakı Tofiq Bəhramov adına Respublika Stadionunda öz oyunlarını keçirir.
Milli komandanın hazırkı vəziyyəti ilə bağlı futbol eksperti Aslan Kərimov Crossmedia.az-a müsahibə verib.
- Keçmişlə müqayisədə milli komanda necə inkişaf edib?
- “Hal-hazırda əvvəlki illərə nisbətən böyük dəyişikliklər baş verib. Taktiki baxımdan daha strukturlu oyun nümayiş etdirirlər. Lakin meydanda mübarizə baxımından keçmiş futbolçuların indiki oyunçulara nisbətən daha yaxşı olduğunu düşünürəm. Bu aspektdə gözəçarpan inkişaf yoxdur.”
- Taktiki dəyişikliklər milli komandaya necə təsir edib?
-“Son taktiki dəyişikliklər elə də fərqli deyil. Müdafiə xətti üçlü, dördlü və beşli sistemlərdə qurulur. Daha çox hücuma meyilli oynamağa çalışılır. Əvvəl daha praqmatik oyun nümayiş etdirilirdisə, indi isə irəliyə çıxmaq hədəflənir.”
- Yeni baş məşqçinin strategiyası nə dərəcədə əhəmiyyətlidir?
“Santuş praqmatik oyun fəlsəfəsi ilə tanınır. Onun əsas prinsipi nəticəyə oynamaqdır: gözəl oyun deyil, üç xal vacibdir. Amma daha yaxşı oyun üçün oyunçu keyfiyyəti də önəmli bir faktordur.”
- Hazırda ən güclü oyunçu kimdir?
-“Bu suala dəqiq cavab vermək çətindir. Əgər çox güclü bir oyunçumuz olsaydı, Avropanın aparıcı klublarında çıxış edərdi. Milli komandada fərqlənən oyunçu yoxdur. Ancaq hal-hazırda ən öndə olan futbolçumuz Mahir Emrelidir, o da Almaniya Bundesliqasında çıxış edir.”
- Milli komandanın uğurlu olması üçün potensial varmı?
-“Daha yaxşı və ya pis oynamaq artıq mümkün deyil, çünki biz D qrupuna düşmüşük. Ancaq gələcəkdə daha yaxşı nəticələr əldə edə bilərik. Beynəlxalq səviyyədə uğur qazanmaq üçün uzun bir yol qət etməliyik.”
-Futbolun inkişafı üçün hansı addımlar atılmalıdır?
-“Oyuncular klublarda və ya akademiyalarda inkişaf edirlər. Bu səbəbdən akademiyaların infrastrukturu və maarifləndirmə çox vacibdir. Regionlarda da akademiyalar yaradılmalı və inkişaf etdirilməlidir. Əgər bu prosesə indi başlasaq, gələcək üçün ümidlərimiz artar. Əks halda, olduğumuz yerdə qalacağıq.”
-Azərbaycan azarkeşlərinin vəziyyəti necədir?
-“Azarkeş mədəniyyətimiz inkişaf etməyib. Milli komanda uduzanda azarkeşlər baxmaq istəmir. Halbuki azarkeş həm yaxşı, həm də pis günlərdə komandasını dəstəkləməlidir. Türkiyə milli komandasını misal göstərmək olar: ağır məğlubiyyətlərə baxmayaraq, onların azarkeşləri həmişə güclü dəstək verir. Bizdə isə yalnız böyük oyunlarda azarkeş sayı artır. Qarabağ FK-ya gəlincə, yalnız ‘İmarət Tayfa’ kimi qruplar hər oyunda dəstək olurlar.”
Aslan Kərimovun bu fikirləri Azərbaycan futbolunun gələcəyinin qurulması üçün vacib məqamlara işarə edir.
Səbinə Vahidova
12:26 03.12.2024
Oxunuş sayı: 17935
