Qırğızıstandakı həftəsonu məktəblərində 20 Yanvar faciəsi anılıb
Qırğızıstanın paytaxtı Bişkekdə, o cümlədən Dostluq və Novonikolayevka kəndlərində fəaliyyət göstərən həftəsonu Azərbaycan məktəblərində 20 Yanvar faciəsinə həsr olunan anım dərsləri keçirilib.
Crossmedia.az xəbər verir ki, bu barədə Diasporla İş üzrə Dövlət Komitəsi məlumat yayıb
Şagirdlərə 20 Yanvar faciəsinin səbəbləri və ağır nəticələri barədə ətraflı məlumat verilib. Hadisələr zamanı 130-dan çox dinc sakinin həlak olduğu, yüzlərlə insanın yaralandığı, insan hüquqları və beynəlxalq hüquq normalarının kobud şəkildə pozulduğu diqqətə çatdırılıb.
Dərslərdə Ümummilli Lider Heydər Əliyevin bu qanlı cinayətə verdiyi siyasi qiymət və onun sayəsində faciə ilə bağlı həqiqətlərin dünya ictimaiyyətinə çatdırılması xüsusi vurğulanıb. 20 Yanvar hadisələrinin Azərbaycan xalqının müstəqillik uğrunda mübarizəsində mühüm mərhələ olduğu bildirilib.
Bu cür anım dərslərinin keçirilməsi bu kimi faciələrin bir daha təkrarlanmaması üçün gənc nəslin tarixi yaddaşının qorunmasına xidmət edir.
14:33 27.01.2026
Oxunuş sayı: 373
