Azərbaycanın Ukrayna ilə strateji tərəfdaşlığı mesajdır
Regional və qlobal geosiyasi proseslərin kəskinləşdiyi bir dövrdə Azərbaycan–Ukrayna münasibətləri yalnız ikitərəfli əməkdaşlıq çərçivəsində deyil, həm də strateji tərəfdaşlıq kontekstində xüsusi əhəmiyyət kəsb edir. Prezidentin köməkçisi Hikmət Hacıyevin Ukraynanın Azərbaycandakı səfiri ilə keçirdiyi görüş bu münasibətlərin cari vəziyyətini və gələcək perspektivlərini bir daha gündəmə gətirir. Xüsusilə Ukraynadakı müharibə fonunda Bakının tutduğu prinsipial və balanslı mövqe həm regionda, həm də beynəlxalq müstəvidə diqqətlə izlənilir. Rusiya-Ukrayna müharibəsində Bakının mövqeyi ilk günlərdən bəri balanslı oldu. Həm strateji tərəfdaşı olan Rusiya ilə həm də suverenliyi pozulan Ukrayna ilə yaxın diplomatik əlaqələrini davam etdirirdi.
Bakı ilə Kiyev arasındakı münasibətlərin hazırkı durumu və strateji əhəmiyyəti barədə Milli Məclisin deputatı Günay Ağamalı Crossmedia.az-a danışıb: "Azərbaycan–Ukrayna münasibətləri hər zaman qarşılıqlı hörmətə, beynəlxalq hüquqa və dövlətlərin suverenliyinə əsaslanan prinsipial mövqe üzərində qurulub. Hikmət Hacıyevin Ukraynanın səfiri ilə strateji tərəfdaşlıq məsələlərini müzakirə etməsi də bir daha göstərir ki, Azərbaycan bu münasibətləri siyasi, iqtisadi və humanitar əməkdaşlıq müstəvisində inkişaf etdirməkdə maraqlıdır. Azərbaycanın mövqeyi ardıcıl, prinsipial və ədalətlidir. Biz hər zaman dövlətlərin ərazi bütövlüyünü və suverenliyini dəstəkləmişik. Çünki bu prinsip bizim öz milli maraqlarımızın və tarixi ədalət mübarizəmizin əsasını təşkil edir. Ukraynanın üzləşdiyi vəziyyət Azərbaycan xalqına və dövlətinə yaxşı tanışdır. Otuz ilə yaxın işğala məruz qalmış bir ölkə kimi biz Ukraynanın ağrısını daha dərindən anlayırıq. Bu gün Azərbaycan regional və qlobal müstəvidə balanslı, məsuliyyətli və etibarlı tərəfdaş kimi çıxış edir. Ukrayna ilə münasibətlər də məhz bu siyasi xəttin tərkib hissəsidir. Humanitar sahədə, enerji təhlükəsizliyi məsələlərində, nəqliyyat-logistika imkanlarında və beynəlxalq platformalarda qarşılıqlı dəstək baxımından bu əməkdaşlıq xüsusi əhəmiyyət daşıyır".
Deputat əlavə edib ki, Rusiya- Ukrayna müharibəsi başladığı andan etibarən ölkəmiz Kiyevə çox ciddi miqdarda humanitar yardımlar göstərmişdir: "Xüsusilə, enerji ilə bağlı edilən yardımlar Ukraynada humanitar böhranın daha da dərinləşməsinə əngəl olmuşdur. Azərbaycan bu məsələdə strateji düşüncəyə əsaslanan mövqe sərgiləyir. Biz heç bir tərəfin qarşısında öhdəlik götürmürük, amma ədalətin, beynəlxalq hüququn və dövlətlərin suverenliyinin yanında olmağı özümüz üçün prinsip hesab edirik. Bu, həm siyasi yetkinliyin, həm də müstəqil dövlət mövqeyinin göstəricisidir. Azərbaycanın Ukrayna ilə strateji tərəfdaşlığı mesajdır. Azərbaycan hüquqa söykənən dünya nizamının tərəfdarıdır. Bu mövqe ölkəmizin beynəlxalq nüfuzunu daha da möhkəmləndirir və Azərbaycanı qlobal miqyasda etibarlı, sözünün çəkisi olan dövlət kimi tanıdır".
Ayhan
11:02 16.01.2026
Oxunuş sayı: 1480
