Valideyinlərin nəzərinə: peşə təhsilinin məzmunu, qaydaları, dərslikləri dəyişir
Peşə təhsilinin məzmununun yenilənməsi və bu sahədə müasir tələblərə cavab verən dərsliklərin hazırlanması son illər təhsil gündəminin əsas mövzularından birinə çevrilib. Texnoloji inkişaf, əmək bazarının dəyişən tələbləri və istehsalatla təhsilin uzlaşdırılması zərurəti peşə məktəblərində istifadə olunan tədris vəsaitlərinə də yenidən baxılmasını qaçılmaz edib. Mütəxəssislər hesab edirlər ki, bu istiqamətdə atılan addımlar peşə təhsilinin cəmiyyətdəki rolunun güclənməsinə və ixtisaslı kadr hazırlığının keyfiyyətinin yüksəlməsinə birbaşa təsir göstərəcək.
Bu barədə Crossmedia.az-a danışan Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli deyib ki, peşə təhsilində yeni dərsliklərin hazırlanması, əslində, illərdir davam edən "köhnə kitab, köhnə metod" probleminin kökündən həllidir: "Biz başa düşməliyik ki, bu günün tələbəsinə 30 il əvvəlin texnologiyası ilə usta olmağı öyrədə bilmərik. Beynəlxalq mənbələrlə yerli təcrübənin balansını tapmaq isə işin ən həssas nöqtəsidir. Beynəlxalq standartlar bizə dünyanın qəbul etdiyi "qızıl qaydaları", müasir cihazlarla işləmək mədəniyyətini gətirir. Amma bunu olduğu kimi köçürmək də düzgün deyil. Biz o qlobal bilikləri götürüb öz bazarımıza, öz zavod və fabriklərimizin reallığına uyğunlaşdırmalıyıq. Yəni, tələbə kitabda oxuduğu müasir texnikanı sabah gedib yerli müəssisədə görəndə "bunu mən tanıyıram" deyə bilməlidir".
Ekspert bu balansın tələbəyə təsirinin birbaşa özünəinamı olduğunu qeyd edib: "Tələbə görür ki, onun öyrəndiyi material Almaniyadakı, Amerikadakı həmyaşıdının öyrəndiyi ilə eynidir, amma tətbiqi öz dilimizdə və öz mühitimizdədir. Bu, "peşə təhsili ali təhsildən aşağıdır" kompleksini qıran ən böyük amildir. Valideyn də, cəmiyyət də görməlidir ki, müasir dərsliklə oxuyan uşaq sadəcə "əl işçisi" deyil, o, texnologiyanı idarə edən mütəxəssisdir. Gələcək baxımından bu dərslik təminatı peşə təhsilinin onurğa sütunudur. Əgər bünövrə — yəni dərslik — möhkəm və müasir olarsa, biz gələcəkdə "diplomu var, amma iş bacarmır" deyilən gənclər ordusu yox, işinin peşəkarı olan kadrlar yetişdirəcəyik. Bu dərsliklər təhsil sistemini sənaye ilə elə bağlayacaq ki, sabah işəgötürən "mənə kadr hazırlayın" deməyəcək, çünki dərslik artıq o işəgötürənin tələbi ilə hazırlanıb. Bir sözlə, bu proses sadəcə kitab çapı deyil, ölkənin gələcək ustasını, mühəndisini və texnoloqunu yetişdirmək üçün qurulan ən doğru yoldur".
Fatimə Məmmədova
11:55 16.01.2026
Oxunuş sayı: 2346
