İranda baş verənlərdə İsrail və ABŞ-nin əli var?- Açıqlandı
İranda baş verən etirazlar regionda və beynəlxalq müstəvidə geniş müzakirələrə səbəb olub. Rəsmi Tehran bu proseslərin daxili sosial narazılıqlardan kənara çıxarılaraq xarici müdaxilə ilə yönləndirildiyini iddia edir. İranın xarici işlər naziri Abbas Əraqçinin açıqlamalarında ABŞ və İsrailin bu etirazlarda rol oynadığı, dinc aksiyaların iğtişaşlara çevrilməsinə cəhd göstərildiyi vurğulanır.
İranda baş verənlər barədə Crossmedia.az-a danışan Orta Doğu Araşdırmalar Mərkəzinin rəhbəri, siyasi şərhçi Sədrəddin Soltan bildirib ki, İranda xüsusən son 45–46 ildə ölkədə baş verən istənilən etiraz aksiyalarında xarici qüvvələrin həllini axtarma adəti var:
"Əvvəllər, yəni 20-ci əsrin əvvəllərində buna "ingilis əli" deyərdilər. İndi isə İranda ABŞ və İsrailin əlini axtarırlar, bir sıra hallarda isə qonşu dövlətlərin İrana qarışdırdığı əli axtarırlar. Amma son etiraz aksiyalarında ABŞ və İsrail haqq nümayişləri, mitinqləri və insanların öz fikrini ifadə etmə azadlıqlarına dəstək olub. Yəni, Tehran hakimiyyəti əgər elə bir faktı varsa, onu gərək açıqlasın. Digər tərəfdən, İranda marağı olan ölkələr və İranın həmin dövlətlərə münasibətindən asılı olaraq prosesi qiymətləndirirlər".
S. Soltan əlavə edib: "ABŞ və İsrail Tehran hakimiyyətini etirazçılara qarşı zor işlətməməyə çağırır. İsrail isə ümumiyyətlə bu rejimin getməsini istəyir. Bu baxımdan, bu adi və müəyyən mənada normal haldır: hansısa ölkədə etiraz aksiyası keçirilirsə, bu ölkədə eləcə də regionda hər hansı dövlətin marağı varsa, həmin prosesi dəstəkləyir. Və yaxud o prosesin aparıcı qüvvələrinə münasibətdə dəstək nümayiş etdirir. ABŞ Prezidenti və Dövlət Departamenti İrandakı prosesi bəyanatla, müsahibə ilə dəstəkləyir. Real, gerçək bir fakt Tehran hakimiyyətinin əlində olsaydı, o bu faktı çoxdan tirajlamışdı".
Mehriban Yariyeva
09:36 12.01.2026
Oxunuş sayı: 2592
