Elmi işçilərin sayının artırılması vacib məsələdir- Qulu Məhərrəmli
Müasir dövrdə dövlətlərin gücü və rəqabət qabiliyyəti artıq təkcə təbii sərvətlərlə deyil, intellektual potensial, elmi biliklər və keyfiyyətli təhsil sistemi ilə ölçülür. Qloballaşan dünyada davamlı inkişafın əsas şərti elmə, innovasiyaya və insan kapitalına söykənən siyasətin həyata keçirilməsidir. Bu baxımdan elm və təhsil sahəsində aparılan islahatlar hər bir ölkənin gələcək taleyini müəyyən edən strateji amil kimi çıxış edir.
Azərbaycan da uzunmüddətli inkişaf hədəflərini məhz bilik iqtisadiyyatının formalaşdırılması üzərində qurur. Son illərdə ölkədə ali təhsil müəssisələrinin yaradılması, təhsilin keyfiyyətinin yüksəldilməsi, müəllimlərin sosial vəziyyətinin yaxşılaşdırılması və elmi fəaliyyətin stimullaşdırılması bu istiqamətdə atılan məqsədyönlü addımların tərkib hissəsidir. Dövlətin elmə və təhsilə verdiyi önəm təsadüfi deyil, çünki bu sahələr milli inkişafın, iqtisadi dayanıqlığın və sosial rifahın əsas təminatçısı hesab olunur.
Məhz bu kontekstdə Azərbaycan Prezidenti İlham Əliyevin yanvarın beşində yerli televiziya kanallarına müsahibəsində elmin inkişafı və islahatların qaçılmazlığı ilə bağlı səsləndirdiyi fikirlər xüsusi aktuallıq kəsb edir. Dövlət başçısı açıq şəkildə bildirir ki, yalnız formal yanaşmalar və mövcud vəziyyətlə kifayətlənmək inkişaf üçün yetərli deyil; köklü islahatlar aparılmadan elmi tərəqqiyə nail olmaq mümkün deyil. Prezidentin bu mövqeyi Azərbaycanın gələcəyini zəka, təhsil və elmi potensial üzərində qurmaq niyyətinin aydın ifadəsi kimi dəyərləndirilir.
Məsələ ilə bağlı Bakı Dövlət Universitetinin Multimedia və Elektron Kommunikasiya kafedrasının müdiri, professor Qulu Məhərrəmli Crossmedia.az-la öz fikirlərini bölüşüb: "Prezidentin müsahibəsində elm sahəsi ilə bağlı müddəaların əsas məğzi ondan ibarətdir ki, iqtisadi inkişafa nail olmaq üçün elmdə də ciddi islahatlar aparılmalıdır. Bu gün dünyada islahat anlayışı, ilk növbədə, tətbiqi elmlərin inkişaf etdirilməsi ilə əlaqələndirilir. Çünki müasir dövrdə reallaşdırılan iri və strateji layihələrin hamısının təməlində konkret elmi nailiyyətlər dayanır. Şübhəsiz ki, elmi işçilərin sayının artırılması və müxtəlif layihələrin həyata keçirilməsi də vacib məsələlərdir. Lakin iqtisadi və milli tərəqqiyə nail olmaq üçün fundamental elmi islahatlar zəruridir. Müasir dünyada inkişafın əsas amillərindən biri məhz elm və elmi islahatlardır. Bu baxımdan hesab edirəm ki, Azərbaycanda Elmlər Akademiyasının və digər elmi institutların fəaliyyətində elmi islahatlar prioritet istiqamət kimi önəmli yer tutmalıdır. Yalnız bu halda hərtərəfli inkişafa nail olmaq mümkündür. Əks halda, əgər proses yalnız söz səviyyəsində qalacaq, söz əmələ çevrilməyəcəksə, heç bir real tərəqqidən danışmaq mümkün olmayacaq".
Elmir Heydərli
10:23 08.01.2026
Oxunuş sayı: 1731
