Azərbaycanın milli maraqlara əsaslanan diplomatik xətti regional sülhə xidmət edir - RƏY
Azərbaycanın xarici siyasətində regional sabitliyin təmin olunması və milli maraqların qorunması əsas prioritetlər sırasında yer alır. Bu kontekstdə xarici işlər naziri Ceyhun Bayramovun zərurət yarandığı təqdirdə Ermənistana səfər etməyə hazır olduğunu bəyan etməsi diqqət çəkir. Nazir ilin yekunlarına dair keçirdiyi mətbuat konfransında bildirib ki, Azərbaycanın milli maraqlarını tələb edən görüş və ya hadisə baş verdiyi halda belə bir səfər mümkün ola bilər. Bu yanaşma Bakı–İrəvan münasibətlərində diplomatik dialoqun prinsipial və maraq əsaslı şəkildə qurulduğunu göstərir.
Crossmedia.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib ki, xarici işlər naziri Ceyhun Bayramovun zərurət yaranacağı təqdirdə Ermənistana səfər edə biləcəyi ilə bağlı bəyanatı regionda sülh və sabitliyin təmin olunmasına yönəlmiş ardıcıl diplomatik xəttin növbəti təzahürüdür.
Deputat qeyd edib ki, Azərbaycan post-münaqişə dövründə Cənubi Qafqazda davamlı sülhün bərqərar olması üçün prinsipial və konstruktiv mövqe nümayiş etdirir: “Ermənistanla münasibətlərin normallaşdırılması, sülh sazişinin imzalanması və kommunikasiya xətlərinin açılması istiqamətində aparılan danışıqların əsas məqsədi bölgədə uzunmüddətli təhlükəsizliyin təmin edilməsidir. Artıq birtərəfli qaydada etimad mühitinin formalaşdırılması istiqamətində bir sıra praktiki addımlar atılıb. Azərbaycan üzərindən Ermənistana Qazaxıstan və Rusiyadan taxıl məhsullarının ixracı həyata keçirilib. Paralel olaraq, Azərbaycana məxsus özəl şirkət Gürcüstan üzərindən Ermənistana benzin ixrac edib. Bütün bunlar sülh kontekstində irəliyə doğru atılan real addımların göstəricisidir”.
Deputatın sözlərinə görə, belə bir səfərin reallaşması ilk növbədə Ermənistan tərəfinin konstruktiv mövqe ortaya qoymasından asılıdır: “Hesab edirəm ki, rəsmi İrəvan beynəlxalq hüququn norma və prinsiplərinə hörmət etməli, Azərbaycanın ərazi bütövlüyünü tam şəkildə tanımalı və real sülhə hazır olduğunu əməli addımlarla nümayiş etdirməlidir. Yalnız bu halda diplomatik münasibətlərin inkişafı mümkün ola bilər. Azərbaycanın regionda əməkdaşlıq mühitinin formalaşması istiqamətində atdığı bütün addımlar xalqımızın milli maraqlarına xidmət edir. Möhtərəm cənab Prezident İlham Əliyevin rəhbərliyi ilə həyata keçirilən uzaqgörən və prinsipial xarici siyasət ölkəmizin regionda sülhün əsas təşəbbüskarı kimi çıxış etməsini təmin edib. Dövlət başçımızın daim vurğuladığı kimi, Azərbaycanın məqsədi qalib xalq olaraq beynəlxalq hüquqa və qarşılıqlı hörmətə əsaslanan ədalətli sülhün bərqərar olunmasıdır”.
Parlamentari bildirib ki, bu siyasi iradə nəticəsində Azərbaycan regional əməkdaşlıq platformalarının formalaşmasında aparıcı rol oynayır və Cənubi Qafqazda yeni təhlükəsizlik sisteminin qurulmasına real töhfələr verir.
Mehriban Yariyeva
13:29 30.12.2025
Oxunuş sayı: 12944
