Aleksandr Duqin: Lazım gələrsə, Avropanı yer üzündən siləcəyik
Rusiyalı filosof, ideoloq Aleksandr Duqin Avropa İttifaqı və Ukrayna müharibəsi ilə bağlı son dərəcə sərt bəyanatlarla çıxış edib.
Crossmedia.az xarici mediaya vistinadən xəbər verir ki, o, Avropanın Rusiya ilə açıq qarşıdurmaya hazırlaşdığını iddia edərək Moskvanın buna adekvat və daha sərt cavab verməyə hazır olduğunu bildirib.
Duqinin sözlərinə görə, hazırda Avropada müşahidə olunan "dinc ritorika" – Rusiyanın Avropaya qarşı müharibə aparmaq niyyətində olmadığına dair iddialar – reallığı əks etdirmir. Onun fikrincə, Avropa Ukraynanı öz təsir dairəsində görür, Rusiya isə Ukraynanı öz tarixi və strateji ərazisi hesab edir. Bu ziddiyyətin artıq müharibə mərhələsinə keçdiyini vurğulayan Duqin "Bu müharibə artıq başlayıb, sadəcə avropalılar onun yeni mərhələsinə keçmək istəyirlər", – deyə qeyd edib.
Rusiyalı ideoloq bildirib ki, Moskva Ukraynada "seçici, yumşaq və uzunmüddətli" əməliyyat apardığını düşünür, lakin Avropa ilə mümkün qarşıdurmada bu yanaşma təkrarlanmayacaq. Onun sözlərinə görə, belə bir halda Avropanın əsas hərbi obyektləri və sənaye infrastrukturu tamamilə məhv edilə bilər. Duqin açıq şəkildə "Lazım gələrsə, Avropanı yer üzündən siləcəyik" ifadəsini işlədib.
Aleksandr Duqin Rusiya Prezidenti Vladimir Putinin mövqeyinə də istinad edərək bildirib ki, Rusiya Ukraynada yalnız "öz ərazilərini azad etdiyini" düşünür və orada yaşayan əhalini "sağaltmaq" məqsədi güdür. Avropanın isə onun fikrincə, "aşağıya doğru yönəlmiş, dərin mənəvi böhran yaşayan bir sivilizasiya" olduğunu iddia edib və Rusiyanın Avropanı "xilas etmək" kimi bir missiyasının olmadığını vurğulayıb.
Duqin Avropa cəmiyyətlərini kəskin tənqid edərək, onları "çürümüş", "əxlaqi baxımdan deqradasiyaya uğramış" və "dərin mənəvi böhran içində olan" strukturlar kimi xarakterizə edib. O, Rusiyanın Ukrayna müharibəsində əldə etdiyi hərbi təcrübənin mümkün Avropa qarşıdurması üçün üstünlük yaratdığını da iddia edib.
Tarixi müqayisələr aparan Duqin Napoleon və Hitlerin Rusiyaya qarşı daha ciddi təhlükə yaratdığını, müasir Avropa elitasının isə onun sözləri ilə desək, "daha zəif və daxildən parçalanmış" durumda olduğunu bildirib.
Bununla yanaşı, Duqin ABŞ-nin müharibəyə birbaşa cəlb olunmasının vəziyyəti kökündən dəyişəcəyini qeyd edib. Onun sözlərinə görə, ABŞ-nin iştirakı ilə baş verəcək müharibə "apokaliptik nəticələrə" gətirib çıxara bilər. "Biz bunu istəmirik, amma buna hazırıq", – deyə o əlavə edib.
Duqinin bu açıqlamaları Rusiya–Qərb münasibətlərində artan gərginliyin ideoloji müstəvidə daha da sərtləşdiyini göstərən növbəti nümunə kimi qiymətləndirilir.
Nigar Yahyazadə
13:45 29.12.2025
Oxunuş sayı: 2953
