Prezident İlham Əliyevin qazandığı uğurların kökündə Heydər Əliyev siyasətinə sədaqət dayanır- Rəy
Azərbaycan Respublikasının Prezidenti İlham Əliyev ölkəmizin müasir inkişaf tarixində mühüm rol oynayan dövlət xadimlərindən biridir. 1961-ci il dekabrın 24-də anadan olan İlham Əliyev Azərbaycanın siyasi, iqtisadi və sosial həyatında uzunmüddətli və strateji təsir göstərmişdir. Onun rəhbərliyi dövründə ölkədə siyasi sabitlik təmin olunmuş, iqtisadiyyat güclənmiş və sosial sahədə bir sıra islahatlar həyata keçirilmişdir. Eyni zamanda, Prezident İlham Əliyev Azərbaycanın beynəlxalq arenada nüfuzunun artırılması və regiondakı mövqeyinin gücləndirilməsini prioritet hesab edir.
Milli Məclisin deputatı Elman Nəsirov Crossmedia.az-a açıqlamasında bildirib ki, Azərbaycan Prezidenti İlham Əliyevin rəhbərliyi altında ölkəmiz son 22 il ərzində böyük inkişaf yolu keçmiş, tarixi nailiyyətlərə imza atmışdır: "Cənab Prezidentin qazandığı uğurların kökündə Heydər Əliyev siyasətinə sədaqət dayanır. O, bu siyasəti həm də dəyişən dünya geosiyasi və geoiqtisadi reallıqlarına uyğun olaraq davam etdirir. Həqiqətən də, Cənab Prezident sadəcə davam etdirici deyil, eyni zamanda bu siyasətə kreativlik və innovativlik gətirərək Azərbaycanın güclü dövlət kimi beynəlxalq arenada möhkəmlənməsinə nail olub".
Deputat qeyd edib ki, 2003-cü ildə xalqın etimadını qazanaraq Prezident seçilən İlham Əliyevin əsas hədəfi işğal altında olan torpaqlarımızın azad olunması olmuşdur: "17 il boyunca Cənab Prezident bu məqsəd uğrunda mübarizə aparıb, cəmiyyəti səfərbər edib və nəticədə güclü iqtisadiyyat fonunda güclü ordu yaradılıb. Bu ordu vətənpərvərlik ruhu ilə torpaqlarımızı işğaldan azad etməyə nail oldu. 44 günlük Vətən müharibəsində qələbə üç əsas sütuna söykəndi. Müzəffər Prezident Cənab İlham Əliyev, onun formalaşdırdığı yenilməz Azərbaycan ordusu və dəmir yumruğa çevrilmiş xalqımız".
E. Nəsirov əlavə edib ki, ölkənin iqtisadi inkişafı bu tarixi nailiyyətlərin əsasını təşkil edir: "2003-cü ildə Azərbaycanın ümumi daxili məhsulu 7,1 milyard manat idisə, hazırda təxminən 134 milyard manata çatıb. Dövlət büdcəsi 1,2 milyard manatdan 38,6 milyard manata yüksəlib, strateji-valyuta ehtiyatları isə 1,6 milyard dollardan 83,5 milyard dollara çatıb. Bu göstəricilər ölkəmizin əldə etdiyi uğurların miqyasını açıq şəkildə ortaya qoyur".
Deputat vurğulayıb ki, Cənab Prezidentin həyata keçirdiyi siyasət Azərbaycan-Türkiyə və Pakistan kimi strateji müttəfiqlərlə əlaqələri gücləndirib: "Bu gün Azərbaycan beynəlxalq aləmdə etibarlı tərəfdaş kimi tanınır və müstəqil siyasət yürüdür. Prezident İlham Əliyevin diplomatik fəaliyyəti nəticəsində Ermənistanla tarixi razılaşmalar əldə edilib, sülh müqaviləsinin imzalanması perspektivi yaranıb. Qarşıda duran hədəflərdən biri isə Qarabağ və Şərqi Zəngəzurun bərpasıdır və bu istiqamətdə ciddi addımlar atılır. Azərbaycanın strateji və iqtisadi inkişafı, güclü ordusu və xalq-hakimiyyət birliyi ölkəmizi regionda önəmli gücə çevirib. Azərbaycan sürətlə inkişaf edir, yeni strateji hədəflər müəyyən edib və onlara çatmaq üçün real addımlar atır. Xalq Prezident İlham Əliyevə dəstək verir, ölkə üçün milli maraqlara uyğun siyasət yürüdülür. Bu da Azərbaycanı dünyanın nüfuzlu dövlətlərindən birinə çevirib".
Mehriban Yariyeva
20:18 24.12.2025
Oxunuş sayı: 1578
