Azərbaycan Yaxın Şərq geosiyasətində artan rolunu gücləndirir
ABŞ-ın The Media Line xəbər agentliyinin saytında dərc olunan məqalədə Azərbaycanın Yaxın Şərqdə formalaşan geosiyasi proseslərdə rolu və yanaşmaları təhlil olunub.
Crossmedia.az xəbər verir ki,məqalədə qeyd olunur ki, İsrail Qəzza sektorunda sabitləşdirici qüvvələrdə Türkiyənin mümkün iştirakını müzakirə etdiyi bir vaxtda Azərbaycan müharibədən sonrakı bərpanın yerli əhalinin qəbulunu və iqtisadi inteqrasiyanı nəzərə almadan mümkün olmadığını vurğulayır.
Prezidentin köməkçisi Hikmət Hacıyev The Media Line nəşrinə açıqlamasında bildirib ki, sabitləşdirici qüvvələr simvolik deyil, real olmalıdır:
“Bu qüvvələr yerli səviyyədə qəbul edilməli və beynəlxalq müstəvidə koordinasiya olunmalıdır”.
Yazıda vurğulanır ki, Azərbaycan özünü Yaxın Şərq, İran, Rusiya və Cənubi Qafqazı əhatə edən geniş geosiyasi dinamikanın fəal iştirakçısı kimi görür. Bu proseslərdə nəqliyyat dəhlizləri, enerji layihələri və strateji ittifaqlar əsas rol oynayır.
Azərbaycan İqtisadiyyat Nazirliyinin şöbə müdiri Hüseyn Hüseynov qeyd edib:
“Biz regionları bir-birinə bağlayan və ümumi maraqlar yaradan sistemlər qururuq”.
Hikmət Hacıyev təhlükəsizliyə yalnız hərbi prizma ilə yanaşmağın dayanıqlı olmadığını vurğulayıb:
“İnteqrasiya olmadan bərpa sadəcə növbəti böhranı təxirə salır”.
Məqalədə Bakının regional strategiyasının İsraillə tərəfdaşlığın dərinləşdirilməsinə əsaslandığı bildirilir. Energetika və Avrasiya təhlükəsizliyi üzrə ekspert Brenda Şaffer Azərbaycanın və İsrailin münasibətlərini “tranzaksion deyil, strateji alyans” kimi xarakterizə edib.
Onun sözlərinə görə, Azərbaycanın unikal coğrafi mövqeyi bu ölkənin ABŞ üçün əhəmiyyətini artırır. Bu xüsusilə “Avraam Sazişləri”nin genişlənməsi və infrastruktur diplomatiyasının inkişafı fonunda aktuallaşır. Energetika bu təsirin əsas elementlərindən biri olaraq qalır; SOCAR-ın İsrailin qaz layihələrində iştirakı buna nümunə göstərilir.
Materialda 2020-ci il müharibəsi, Bakının Qarabağ üzərində nəzarəti bərpa etməsi və bunun regional güc balansına təsiri də xatırladılır. Eyni zamanda Türkiyənin Azərbaycanın əsas müttəfiqi kimi rolu xüsusi qeyd olunur.
Bununla yanaşı, məqalədə erməni diaspor təşkilatlarının, xüsusilə ANCA-nın fəaliyyəti Ermənistanın həm daxili, həm də xarici siyasət proseslərini çətinləşdirdiyi vurğulanır.
Analitiklərin fikrincə, Azərbaycan Qəzzaya qoşun göndərməyə meyilli deyil, lakin diplomatik təşəbbüsləri dəstəkləyə bilər. Hikmət Hacıyev bu mövqeyi belə ifadə edib:“Biz bir-biri ilə danışmayan tərəflərlə əlaqə saxlayırıq. Vasitəçilik bizim üçün eskalasiyanın qarşısını almaq deməkdir”.
Məqalənin yekununda qeyd olunur ki, Bakı üçün nəqliyyat dəhlizləri və iqtisadi inteqrasiya sabitliyin əsas alətləri hesab edilir. Siyasi və iqtisadi reallıqların nəzərə alınmaması isə istənilən sabitləşdirmə cəhdini uğursuzluğa məhkum edir.
Nastya Qəniyeva
18:30 24.12.2025
Oxunuş sayı: 1785
