Bayram və hüzn günlərində saatlıq ödəniş daha ədalətli mexanizmdir – İqtisadçı
Əmək münasibətlərində işçilərin hüquqlarının daha etibarlı qorunması və ədalətli əməkhaqqı mexanizminin formalaşdırılması məqsədilə qanunvericilikdə mühüm dəyişikliklər nəzərdə tutulur. Xüsusilə bayram günləri, istirahət günləri, səsvermə günü və ümumxalq hüzn günlərində görülən işlərin ödənişi məsələsi uzun müddətdir müzakirə mövzusu idi. Açıqlanan yeni dəyişikliklər bu sahədə mövcud boşluqların aradan qaldırılmasına, saatlıq əməkhaqqının da nəzərə alınmasına və işçilərin əlavə əməyinin daha yüksək məbləğdə qiymətləndirilməsinə xidmət edir. Təklif edilən yeniliklər əməkhaqqı ödənişində beynəlxalq standartlara uyğunlaşmanı təmin etməklə yanaşı, xüsusən qeyri-tam iş günü və saatlıq iş rejimində çalışan işçilər üçün daha əlverişli hüquqi zəmin yaradır.
Mövzu ilə bağlı iqtisadçı Eldəniz Əmirov Crossmedia.az-a bildirib ki, 2026-cı ilin dövlət büdcəsinin müzakirəsi zamanı bir sıra qanun layihələrinə kompleks şəkildə əlavə dəyişikliklər edilir: “Bu dəyişikliklər Əmək Məcəlləsini də əhatə edəcək. Nəzərdə tutulan yeniliklərdən biri də bayram günləri, istirahət günləri və ümumxalq hüzn günlərində görülən işlərə, eləcə də digər tədbirlərə görə əməkhaqqının hesablanmasında artıq günlük deyil, saatlıq yanaşmanın tətbiq olunmasıdır”.
İqtisadçının sözlərinə görə, mövcud praktika göstərir ki, bu tip günlərdə işəgötürənlər bəzi hallarda işçiləri qrafikdən kənar işə cəlb etsələr də, onların əməyinə görə əlavə ödəniş edilmir və məsələ ümumi aylıq əməkhaqqı kontekstində qiymətləndirilir: “Bu isə işçilərin əməyinin faktiki olaraq nəzərə alınmaması ilə nəticələnir. Saatlıq yanaşma isə daha ədalətli mexanizmdir. Məsələn, işçi bayram günündə 3 saat işə cəlb olunubsa, ona bütöv günün deyil, həmin 3 saatın haqqı ödənilər. Bu halda işçi qazanmış olur, çünki əvvəlki yanaşmada ümumiyyətlə ödəniş almaya bilərdi. Yeni mexanizm işəgötürənlər üçün də daha optimaldır. İşəgötürən həm daha şəffaf və ədalətli yanaşma sərgiləmiş olur, həm də faktiki işlənən vaxta uyğun ödəniş etdiyi üçün əlavə maliyyə yükü ilə üzləşmir. Yəni bu mexanizm hər iki tərəfin maraqlarına cavab verir”.
O, hesab edir ki, saatlıq əməkhaqqı prinsiplərinin hüquqi əsaslandırılması və bu sahədə normativ bazanın formalaşdırılması olduqca vacibdir: “Bütün hallarda saatlıq əməkhaqqı ilə bağlı hüquqi mexanizmlərin dəqiq müəyyənləşdirilməsi əmək münasibətlərində şəffaflığın artırılmasına, işçi hüquqlarının qorunmasına və əmək bazarında daha sağlam münasibətlərin formalaşmasına xidmət edəcək”.
Mehriban Yariyeva
12:52 17.12.2025
Oxunuş sayı: 1233
