Xarici xəbərlər
ABŞ-də qadın müəllim kimi məktəbə daxil oldu
ABŞ-nin Viskonsin ştatında müəllim olmayan qadın təhlükəsizlik yoxlamasından keçərək liseyə daxil olub və özünü əvəzedici müəllim kimi təqdim edərək sinifdə şagirdlərlə təmas qurub.
Crossmedia.az xəbər verir ki, “Rufus King” liseyində baş verən hadisə məktəbin təhlükəsizlik tədbirlərini gündəmə gətirib.
Amy Jones adlı qadın Miluoki şəhərindəki məktəbə gəldikdən sonra əvəzedici müəllim kimi davranaraq siniflərdən birinə daxil olub. Onun məktəb tərəfindən bu vəzifəyə təyin edilmədiyi şagirdlərlə ünsiyyət qurduqdan sonra məlum olub.
İddialara görə, Jones dərs keçmək əvəzinə şagirdlərin irqi, çəkisi və xarici görünüşü ilə bağlı təhqiramiz ifadələr işlədib. Onun bir şagirdə “kök uşaq” dediyi və sinifdə söyüş söydüyü də iddia edilir.
Hadisədən sonra məktəb həmin gün valideynlərə əvəzedici müəllimin şagirdlərə qarşı yolverilməz ifadələr işlətdiyini bildirib. Daha sonra isə həmin şəxsin əslində məktəbin əməkdaşı olmadığı barədə ailələrə məlumat verilib.
Hadisə zamanı Jones məktəbin təhlükəsizlik məntəqəsindən keçib, resepsiyonda qeydiyyatdan keçib və heç bir maneə ilə qarşılaşmadan sinfə daxil olub.
Məktəbin direktoru Doreen Badillo valideynlərə göndərdiyi açıqlamada qadının qəbul edilməsi zamanı tələb olunan prosedurların yerinə yetirilmədiyini bildirib. Onun sözlərinə görə, əvəzedici müəllim kimi məktəbə gələn şəxsin sistemdə qeydiyyatda olub-olmaması və həmin məktəbdə işləməyə səlahiyyətinin olub-olmaması yoxlanılmalı idi.
Hadisə valideynlər arasında da narahatlıq yaradıb. Ailələr məktəbə kənar şəxslərin girişinin qarşısının alınması üçün təhlükəsizlik tədbirlərinin gücləndirilməsini tələb ediblər.
Jones hadisədən sonra saxlanılıb və məhkəmə qarşısına çıxarılıb. Ona “dövlət əməkdaşı kimi davranmaq” və “uşaqları zərərli məzmuna məruz qoymaq” daxil olmaqla bir sıra ittihamlar irəli sürülüb.
Məhkəmə komissarı Rosa Barillas məktəbdə uşaqların təhlükəsizliyinin təmin edilməli olduğunu vurğulayıb. Jonesun bu ay ərzində yenidən məhkəmə qarşısına çıxacağı gözlənilir.
23:04 07.10.2026
Oxunuş sayı: 66
