Çarpaz baxış
Pənah Hüseyn siyasətdən gedir? "İstefa vermişəm, amma..."
Dekabrın 14-də Azərbaycan Xalq Partiyasının (AXP) VII növbədənkənar qurultayı keçirilib. Partiyanın sədri Pənah Hüseyn bildirib ki, qurultay onun istefasını qəbul edib və Sadıqov Qiyas Böyükağa oğlu AXP-nin yeni sədri seçilib.
“Qurultay mənim istefamı qəbul etdi. Sadıqov Qiyas Böyükağa oğlu AXP sədri seçildi. Uğurlar!”, – deyə P.Hüseyn qeyd edib.
Keçmiş baş nazir, tanınmış ictimai - siyasi xadim Pənah Hüseyn AXP-yə uzun illərdi ki, rəhbərlik edirdi. O, 1999-cu ildən etibarən bu partiyaya rəhbərlik edirdi. Elə buna görə indi verilmiş bu qərar diqqət çəkir.
P.Hüseyn istefası barədə Crossmedia.az-ın suallarını cavablandırıb:
- Pənah bəy, uzun illərdir rəhbərlik etdiyiniz partiya ilə bağlı bu qərarınız nə ilə bağlıdır?
- Əslində bu məsələ bir ildir ki, gündəmdədir. Əsas səbəb partiyanın Milli Məclisə seçkilərdə təmsil olunmaması idi. O zaman idarə heyətinin qərarı ilə iclas təxirə salındı və növbədənkənar qurultay təyin olundu. İclasımız dünən baş tutdu, çıxış etdim. Sədrlikdən getmə səbəblərimi bir daha açıqladım. Partiya rəhbərliyinin yenilənməsinin vacibliyi, bəzi hallarda müşahidə edilən qeyri - sağlam münasibət də qərarıma təsir etdi.
- Yeni sədrdən əsas gözləntiləriniz nələrdir?
- Dünən Qiyas bəyin namizədliyi dəstəkləndi və o, sədr seçildi. Bəyannamə və nizamnaməmizin tələblərinə uyğun olaaq partiya mübarizəsini davam etdirəcək. Əsas məsələlərdən biri də partiyaya daha çox gəncin cəlb olunmasıdır.
- Bu qərarınızı digər müxalifət partiyalara da mesaj kimi qiymətləndirmə olarmı?
- Bu, bizim və şəxsən mənim öz qərarım idi. Düşünürəm ki, hər partiya özü qərar verməlidir.
- Son olaraq, bundan sonra nə edəcəksiniz, fəaliyyətinizi necə davam etdirəcəksiniz?
- Mən sadəcə sədrlikdən istefa vermişəm. Amma partiyanın icraiyyə komitəsinin üzvüyəm. Aktiv siyasətdən də getmirəm. Əksinə, fəaliyyətimizi əvvəlki qaydada davam etdirəcəm.
13:26 15.12.2025
Oxunuş sayı: 1223
