Valideyn aqressiyası fonunda qurban gedən körpələr - Ekspertlər danışdı
Oktyabrın 12-də Mingəçevir şəhərində baş vermiş dəhşətli hadisə təkcə hüquqi müstəvidə deyil, həm də cəmiyyətin sosial-mənəvi təfəkküründə ciddi suallar doğuran əhvalat kimi yadda qaldı. Bir yaşlı körpənin soyuq zirzəmiyə atılması barədə xəbər təkcə fakt kimi yox, həm də insanlıq duyğuları üzərində sarsıdıcı bir zərbə kimi rezonans yaratdı. Daxili İşlər Nazirliyinin məlumatına əsasən, bu hadisəni törətməkdə şübhəli bilinən, 1994-cü il təvəllüdlü G. Məmmədova polis əməkdaşları tərəfindən müəyyən olunaraq saxlanılıb və hazırda cinayət işi üzrə istintaq aparılır.
Bu tip hadisələr sırf cinayət maddələri ilə məhdudlaşmır; məsələni doğuran sual budur: cəmiyyətdə nə baş verir? Ana instinktinin sarsılması, sosial dayaqların zəifləməsi, psixoloji təzyiqlər, ailədaxili gərginliklər, iqtisadi sıxıntılar – bütün bu amillər bəzən insanı ən gözlənilməz addımlara sürükləyir. Bir zirzəmi divarları arasında atılmış körpə taleyi cəmiyyətin içində yığılıb qalan problemlərin səssiz hayqırtısı kimi səslənir.
Bu hadisə təkcə hüquq-mühafizə orqanlarının araşdırmalı olduğu cinayət deyil, həm də sosial institutların, psixoloqların, ailə mütəxəssislərinin, sosioloqların diqqət yəkməli olduğu bir siqnaldır. Çünki uşaq böyütmək bir yalnızlıq deyil, bir məsuliyyət sistemidir; analar düşdükcə, cəmiyyət də uçurumun kənarına sürüşür.
Hazırda istintaq davam edir, lakin suallar açıqdır: bu faciəvi addımın kökündə hansı sosial səbəblər dayanırdı? Bu hadisənin qarşısını almaq olardımı? Və ən əsası – analar niyə zəifləyir, cəmiyyət niyə onları tək buraxır?
Sosioloq Əhməd Rəhmanov bu barədə Crossmedia.az-a açıqlamasında deyib ki, bu gün insanlar bir-birinə, hətta özlərinə və öz prinsiplərinə qarşı laqeyd yanaşırlar: "İnsanlar sanki yalnız “bu gün”lə yaşayır, sabah haqqında düşünmək istəmirlər. Ona görə də belə hallar, təəssüf ki, getdikcə daha da çoxalır. İnsan gələcəyə ümidlə baxmalıdır. Lakin bu gün həmin ümid bir çoxlarında yoxdur. Məsələn, həmin qadın danışır ki, vaxtilə ümid edib: kiminləsə əlaqə quracaq, kiminləsə ailə quracaq, xoşbəxtlik uğrunda vuruşacaq. Amma alınmayıb. Bu isə göstərir ki, onun gələcək ümidi sarsılıb".
Sosioloq, həmçinin övladların isə belə insanların gözündə sanki sadəcə maneəyə çevrildiyini qeyd edib: "Əllərində bir alət kimi görünür və sonda lazım olmayan bir yükə dönür. Nəticədə insanların psixikası sındıqca, gələcəyə ümid də itib. Bütün bu problemlər də, əslində, elə buradan qaynaqlanır".
Hüquqşünas Ramil Süleymanov isə söyləyib ki, qeyd olunan fakt təsdiqini taparsa, hüquq mühafizə orqanları Azərbaycan Respublikasının Cinayət Məcəlləsinin 143-cü maddəsini tətbiq etməklə cinayət işi başlaya bilərlər: "Bu maddə “təhlükədə qoyma” anlayışını ifadə edir. Təhlükədə qoyma o hallara aiddir ki, insan həyatına və sağlamlığına ciddi təhlükə mövcud olduğu şəraitdə köməksiz vəziyyətdə olan şəxsin müdafiəsiz buraxılması baş verir. Həmin halda ana, uşağın qayğı və mühafizəsini təmin etməli, onun həyatına təhlükə yarada biləcək halların qarşısını almalı idi. Bu öhdəlikləri bilə-bilə yerinə yetirməmək cinayət əməlinin tərkibini formalaşdırır. Məcəllənin 143-cü maddəsinə əsasən, belə hərəkətə görə anaya min manatdan min beş yüz manatadək cərimə cəzası tətbiq oluna, həmçinin altı aya qədər müddətə azadlıqdan məhrumetmə ilə cəzalandırılması mümkündür".
14:56 08.12.2025
Oxunuş sayı: 1249
